Hopi satisfactorio e reunion Tripartite di Ministernan di Husticia di Reino
Minister Arthur Dowers:
ORANJESTAD (AAN) — Minister di Husticia mr. Arthur Dowers a duna su comentario na nos redaccion, tocante e reunion cu el a tene cu e gobernante Hulandes señor Hirsh Ballin y sra. Magaly Jacoba, Minister di Husticia di Antiyas. E dignatario a menciona cu gobierno a keda hopi satisfecho cu e reunion aki, cual a bay den un ambiente hopi positivo. El a duna di conoce cu Aruba a presidi e reunion aki, y e tabata tin e responsabilidad pa organiza henter e reunion y guie.
Na final tur partido presente, Minister di Hulanda, Minister di Antiyas y Secretario di Estado di Antiyas y dos diputado, un di Sint Maarten y un di Curacao, nan tur a sali for di e reunion cu un satisfaccion grandi.
Nan a logra di trata tur e puntonan cu tabata tin riba agenda den un tempo relativamente cortico, y aspectonan cu tabata mustra cu por a crea tension of duna problema, tambe a logra di clarifica nan.
Temanan cu a wordo trata ta di indole regular, manera Landsrecherche, Traficacion ilegal di persona y trecemento di hende ilegal na e diferente paisnan di Reino.
“ Tambe nos a trata e aspecto di prison, con e personanan cu ta deteni del cel di polis y den prison con e trato eynan ta, y nos a papia riba e asunto di criminalidad den su totalidad”, Minister Dowers a splica.
El a subraya cu otro aspecto hopi importante cu a wordo presenta tanto for di Antiyas como di Hulanda, ta cu nan ta atacando e criminilidad hubenil.
Na Antiyas y na Hulanda nan tin un plan integral di husticia pa hobennan, unda cu na luga di acerca un problema solamente for di e aspecto criminal, nan ta aborda esaki tambe for di e aspecto social y di enseñanza, y e ta dunando resultadonan hopi positivo.
“ Esaki tambe ta e punto di salida di nos gobierno, pa loke ta trata e hobennan den criminalidad, y den pasado, na varios ocasion mi a mustra riba e hecho cu nos no por permiti simplemente pa cera hobennan y pa no mira e problema cu ta buta cu nan ta yega na criminalidad.
“ E presentacion di ayera, di Antiyas y Hulanda ta un sosten pa e pensamentonan cu nos tin akinan y pa e maneho cu nos ta bay hiba”, Minister Dowers a subraya.
