Huez a haya incomprendibel cu muher a saca yiu di 9 aña for di cas, pa su pareha
ORANJESTAD(AAN): Recientemente na corte a tuma lugar un caso den cual Carlos M.A a wordo acusa di intencionalmente cap un persona na su braza cu machete riba 20 di October 2009. Huez a repasa rapport di e caso, den cual tin para entre otro e denuncia di e victima. E victima a splica cu e tin 2 yiu cu su ex pareha kende ta bibando cu Carlos A. y na dado momento el a topa cu un di su yiunan cu tabata yorando y e yiu a bise cu Carlos a bise cu e no ta sirbi. Na dado momento el a bay YMCA na San Nicolas riba scooter pa busca su otro y segun e victima el a wak Carlos Sali for di auto y bin den su direccion cu machete den man.
Carlos tabata zundra y a cuminza zwaai cu e machete. E homber a bisa cu el a pone su braza su dilanti pa proteha su mes y su yiu y e machete a cap na su braza, pa cual e mester a haya 3 ‘stitch’.
Dos testigo a wak y confirma loke e victima a trece dilanti, pero un di nan a bisa si cu el a wak cu e victima tabata tin un cuchio den su Carson.
E no a saca e cuchio sinembargo.
E acusado mes a declara cerca polis cu e homber tabata influencia su yiunan contra dje.
Segun huez Carlos a bisa tambe cu un di e yiu hombernan di su pareha constantemente ta gaña cu e ta sute.
Carlos door di esaki a bisa su pareha cu lo ta mihor pa e yiu ey no biba mas cu nan y den corte huez a bisa cu ta increibel tende algo asina, unda cu un homber ta bisa su pareha pa saca su yiu kende tin apenas 9 aña, for di cas.
Pesey e mucha tabata yora ora su tata a tope.
E wela a yama mama di e mucha pa puntra kico a pasa y e mama a bisa cu lo ta mihor pa e mucha no bin cas mas, pa evita problema.
Huez a cuestiona ki tipo di mama e muher ey lo por ta, pa saca su yiu di apenas 9 aña for di cas, pa e keda bon cu su pareha cu no ta tata di e mucha.
Huez a sigui repasa declaracion di Carlos, den cual e ta bisa cu el a Sali bay riba e homber cu machete, pa papia cune.
Huez a puntre dicon el a bay cu machete den man y el a bisa cu ta pasobra e homber anteriormente a menaze cu cuchio.
Huez a bise cu si e tabata sa cu e homber tabata tin un cuchio, e por a djis evita y core bay.
Den corte Carlos e ora ey a bisa huez: “Oh, esey ta nifica cu semper mi tin cu core pe?”.
Huez a puntre e ora ey si su intencion cu e machete tabata pues pa regla e asunto ‘on the spot’ di biaha.
Carlos a declara na polis cu door cu el a wak e homber saca e cuchio pe, el a uza e machete.
Despues el a drenta auto y core bay cerca su otro amante y eynan el a sconde e machete.
Huez a puntre si su pareha actual tabata sa di e otro muher y el a bisa cu e tempo ey no ainda, pero awor si.
Pa loke ta nan relacion, segun Carlos nan tin plan pa casa cu otro.
Fiscal a exigi un castigo di 10 dia cu el a sinta caba y un multa di 750 florin.
Huez a bay di acuerdo cu exigencia di fiscal.
