Hulanda ta bay haci un esfuerzo pa yuda Gobierno di Aruba maneha e situacion di Valero
Minister Presidente Mike Eman a señala:
ORANJESTAD (AAN): Durante un conferencia di prensa ayeramainta, Prome Minister Mike Eman a indica cu Hulanda ta bay haci un esfuerzo pa yuda Gobierno di Aruba pa maneha e situacion di Valero. A indica cu no tin ningun garantia pero e ta un esfuerzo hopi importante cu Minister Maxime Verhagen a compromete su mes y a priminti cu di nan parti Hulanda lo bay haci nan maximo esfuerzo pa convence e gobierno di Brasil of e compania nacional di petroleo di Brasil, esta Petrobras pa mira den e direccion di Aruba.
Segun Minister Presidente, si por logra esey so caba cu e portanan ta habri pa un dialogo y pa studia tur opcion, e ora ey por cuminza encamina un proceso cu un alternativa mas pa futuro di e refineria.
Cu Minister di Transporte y Comunicacion di Reino Hulandes Sr. Camile Eurlings a yega tambe na palabracion cu e tambe di su parti ta bay haci maximo esfuerzo durante di e mision aki pa yuda pais Aruba den e contactonan cu Petrobras, a expresa.
Mirando cu Sr. Eurlings ta bayendo Brasil cu un delegacion economico hopi importante. Gobierno ta spera cu door di e importancia di e mision hulandes aki pa Brasil, e esfuerzonan tambe di Minister Eurlings lo por tin influencia hunto cu esun di Minister Verhagen pa habri un porta pa Aruba na Petrobras pa busca un solucion pa e situacion di e refineria, a declara.
Banda di esaki a agrega Gobierno a haci apelacion na e dos ministernan hulandes aki den e reunion cu nan pa na e mesun momento cu mira cu tin un porta habri na Brasil pa atencion pa Petrobras, pa nan tambe haci un esfuerzo e ora ey pa busca un entrada pa Minister di Energia Sr. Mike de Meza pa e haci un bishita directamente despues di esun di e dos ministernan hulandes.
E mandatario a enfatiza cu esaki ta dos minister importante den e proceso cu gobierno ta busca pa un apertura pa e problema di e refineria.
A laga sa cu e ta contento cu e relacionnan den Reino ta na e nivel aki y ta den e estado constructivo cu por haci tipo di apelacionnan asina ariba e ministernan aki pa contribui cu nos den momentonan tog hopi importante y cu ta retonan pa nos pais y pone nan cana den un direccion positivo.
