Home Cultura International Aruba Piano Festival ta priminti di bira grandi e aña aki...

International Aruba Piano Festival ta priminti di bira grandi e aña aki atrobe

2
1
SHARE
- Advertisement -

Entre 17 pa 24 di april 2010 den Cas di Cultura

Piano Festival (1)ORANJESTAD (AAN): Entre dianan 17 te cu 24 di April, e 4th International Aruba Piano Festival ta bay tuma lugar den Cas di Cultura. Stichting Crescendo, cu ta organiza e evento aki, a invita 14 artista internacional pa duna presentacion na Aruba.

Ta trata di musiconan renombra cu a gana varios premio internacional y ta toca den e salanan mas prestigioso na mundo manera Concertgebouw na Amsterdam, Teatro Colon na Buenos Aires, Warsaw Philharmonic Hall y Carnegie Hall na New York.

   AÑA DI CHOPIN: E festival lo habri riba diasabra 17 di April, cu un homenage na Frederic Chopin, un di e compositornan mas importante den historia. E musica di Chopin a inspira varios compositor Arubiano y Antiyano, manera Jacobo Palm, Wim Statius Muller y Padu Lampe. E aña aki nos ta celebra e 200 aniversario di e compositor aki.

  RECITALNAN: Tur anochi e artistanan internacional lo presenta un recital cu un diferente tema: “From Foreign Lands & People” riba dialuna, “Sounds of the World” riba diamars. “An Evening of Romantic music” riba diaranson, “An Evening of Spanish music” riba diahuebs, “An Evening of French music” riba diabierna, mientras cu e festival mes ta clausura cu “An Evening of German music” riba diasabra 24 di April.

  E recitalnan ta tuma lugar na Cas di Cultura pa 8 or di anochi y ta dura mas o menos 2 ora. Entrada ta solamente 25 Florin.

  CRESCENDO PIANO COMPETITION 2010:  Un parti importante di e festival ta e “Crescendo Piano Competition”. Den e competencia aki, pianistanan hoben (entre 8 y 18 aña) di Aruba ta demostra nan talento. E competencia ta cuminsa cu un “preliminary” den dos categoria: 8 te cu 12 aña y 13 te cu 18 aña. Den e “preliminary”, tur participante ta presenta un (1) obra. Di cada categoria, un maximo di tres (3) participante lo avansa pa e finalnan. Den e finalnan no tin diferente categoria mas y e participantenan ta toca dos (2) obra. E obra cu a worde toca den e “preliminary” no por worde ripiti den e finalnan mas.

   Pa e ganador maximo di e Crescendo Piano Competition 2010, Aruba Scholarship Foundation ta cubri e gastonan di piano-les pa un aña completo (di mei 2010 te cu april 2011) te na un balor di Afl.2400. E runner-up ta ricibi 3 luna di piano-les paga te cu un maximo di Afl.600. E ganador ta liber pa scohe un docente di su preferencia. Na e manera aki, Aruba Scholarship Foundation ta inverti den futuro musical di Aruba y ta demostra nan confianza den e nivel halto di e competencia y e participantenan.

  Riba invitacion di “Classical Music Board Bonaire” y “Curacaosche Kunstkring”, e ganador maximo ta haya e tremendo oportunidad pa presenta na Boneiro y Curaçao. Tur gasto ta worde paga door di e organizacionnan aki.

  E “preliminary” ta tuma lugar Diadomingo 18 di April y e finalnan ta riba Diasabra 24 di April.

  Inscripcion ta sera dia 9 di April. Pianistanan cu kier participa por download un “application form” for di e website: www.arubapianofestival.com y entrega esaki prome cu 9 di April na Cas di Cultura.

   TICKETS: Tickets pa e evento aki ta obtenibel caba na e.o. Cas di Cultura.  Tin e oportunidad pa cumpra un “Festival Pass”. Cu e pass aki, por bishita tur e recitalnan, e matinee y e competencia di piano.

   PATROSINADORNAN DI APF 2010: Cu e Aruba Piano Festival ta un evento di clase y calidad, ta mustra den e sosten grandi cu e ta haya di e siquiente patrosinadornan: Gobierno di Aruba, UNOCA, Prins Bernhard Cultuurfonds Nederlandse Antillen & Aruba, Aruba Tourism Authority, AHATA, Aruba Timeshare Association,  y Vertegenwoordiging van Nederland.

- Advertisement -

1 COMMENT

  1. Stop di usa nomber di Aruba cada projecto si acaso nos musiconan no ta e musiconan principal. Nos ta gastando mucho placa riba promocion pa nos Aruba usando artistanan y tambe musiconan internacional. Nos Aruba mes tin suficiente hende capacita pa carga cualkier evento grandi patrocina internacional enbes di usa y paga esnan di afor cada bes. Stop di neglisha nos Rubianonan. Stop di malusa nomber di ARUBA cu cada evento internacional. BERGUENSA boso mester tin.

DUNA COMENTARIO

Please enter your comment!
Please enter your name here