La Fama a bira campeon di Volleyball Damas U-21
Diabierna den Centro Deportivo Betico Croes a sigi e weganan di final: Den Damas U-21, La Fama a titula Campeon, cu un score di broma cu ne: 3-0, asina La Fama a gana tambe e derecho pa hunga den degradatie/promotie hunto cu POVA y Noord Country Club pa saca e team cu ta bai sigui den A-klas. Pabien La Fama. La Fama a cuminsa aña pasa den Hubenil, e aña aki nan a dicidi di bai Damas U-21 y mira e resultado. Pauline Arends ta un hungador formidabel, cu no ta duna chens pa contricante score. Exito den proximo weganan, La Fama. Exito Irald Phelipa coach di La Fama.
Despues tabatin dos wega den A-klas Damas: YMCA y Gazelles. Den di tres set un hungador di Gazelles a haya un incidente unda cu aparentemente e hungadora su pia a bola y esaki a pone cu e mucha muher a keda benta basta rato cu dolor, sin embargo tabata increibel pa mira cu no tabata tin un First Aid Kit disponibel pa atende e casonan asina, e hungadora na cierto momento a bai den shock y Dios gracia cu casa di Minister Mike de Meza tabata presente pa wak e weganan, y el a baha ariba cancha mesora pa atende cu e hungadora cu a la final a wordo pidi pa un ambulans transporte hospital.
Nos por a ripara cu e hungadornan di Gazelles tabata visiblemente preocupa pa nan amiga y esaki a pone cu nan tabata basta down pa continua e wega y manera cu personal di ambulans a transporta e hungadora pa hospital, e referee mester a fluit e wega af. YMCA ta gana atrobe cu score di 3-0.
Di tres wega tabata entre e rivalnan di semper: La Fama y Centro di Bario Noord. Despues di dos set pa La Fama, CBN a score un set.
Den di cuater set James Hasell a drenta, pero e tabata bastante warmed up pa por a kibra e furia di La Fama. E score a termina 3-1 pa La Fama.
Diadomingo ta di tres wega pa ambos categoria. Si YMCA gana e serie ta termina, sino tin wega diaranson. Si La Fama gana tambe e serie ta termina. Sino tin wega diaranson.
