La Fama a titula Campeon di Caballeros A Klas y Gazelles a keda bibo pa hunga un wega mas Diaranson awor
ORANJESTAD (AAN)— E bataya feroso entre e teamnan di volleyball di A Klas, esta La Fama vs CBN, finalmente a conoce un vencedor, y esaki tabata La Fama. Diadomingo anochi e dos teamnan aki a enfrenta otro caminda e serie di A Klas tabata na fabor di La Fama cu 2 wega gana y 0 perdi, enfrenta CBN cu a purba pa logra un oportunidad pa bai un wega mas dunando basta hard time na e savaneteronan, pero na final y scorenan masha preta, La Fama a bin decidido pa caba e cuenta y logra e di 3 victoria descisivo ganando e wega aki 3-0.
E scorenan tabata como lo siguiente: Prome set 25-22, di dos set 25-15 y e di tres set 30-28.
Un pabien na e team di La Fama pa su titulo di Campeon A Klas y tambe campeon di Damas U-21.
Entre otro, e prome wega di atardi tabata den e categoria Damas A Klas, entre YMCA vs Gazelles.
Despues di e final di wega dramatico cu a tuma lugar diabierna ultimo, e serie aki tabata 2-0 na fabor di YMCA, by the way, e hungadora cu mester a wordo transporta hospital a bira bon y a hunga e di tres wega di Diadomingo.
Coach di Gazelles a declara na Diario Deportivo cu el a bin concentra pa gana e wega di Diadomingo pa asina por bai un wega mas pa busca e empate den e serie.
E dos prome set nos por a mira cu YMCA a pasa basta hard time cu e refereenan y den e di dos set, coach di YMCA a haya carchi cora y mester a bai sinta e resto di e set y sigur e capitan di YMCA tambe nos por a mira cu e mester a guli basta marga durante e wega aki, aunque coach di Gazelles na su turno tambe mester a sufri e mesun destino cu su colega di YMCA.
Nos por a mira un wega basta duro pa e teamnan aki ya cu a bai 5 set na unda cu ambos equipo a bringa duro cada punto y finalmente Gazelles a logra gana e wega aki 3-2.
E scorenan tabata como lo siguiente: Prome set: 21-25 pa Gazelles, Di dos set: 25-18 pa YMCA, di tres set: 25-16 pa YMCA, di cuater set: 27-30 pa Gazelles y di cinco set: 15-17 pa Gazelles.
Cu esaki Gazelles ta keda bibo den e serie cu awor ta bira 2-1 ainda na fabor di YMCA y aunke nan espectativanan ta pa gana e wega di Diaranzon awor pa asina por empata e serie, nos ta kere cu YMCA lo bin tambe bon desidido pa caba e cuenta y gana nan di tres wega desicivo, asina ta cu hopi cos por pasa diaranson awor:
Gazelles lo gana e wega y empata e serie? Of YMCA lo gana su di tres wega desicivo pa bira campeon di Damas A Klas? No perde e tremendo clash diaranson awor 6’or di atardi na Centro Deportivo Betico Croes.
