Lo saca lo mihor di cada un di e rapportnan cu a worde traha y ehecute
Cambio ta na caminda pa departamento di Labor
ORANJESTAD (AAN): Minister di Labor, Otmar Oduber, durante conferencia di prensa di Gobierno a indica cu rapport di Banco Central a mustra loke ya caba el a bin ta indica for di algun tempo atras, esta cu 2009 a conoce un crecimento di entre 3 pa 3.2% den desempleo na Aruba.
Minister Oduber ta conciente cu ta trata di un problema grandi y ta bisa cu Departamento di Labor pa hopi aña a worde manipula den hopi sentido y nan credibilidad na e momentonan aki no ta asina halto den nos comunidad. door di esey Minister Otmar Oduber a tuma e decision, cu den Conseho di Ministro a worde aproba December ultimo, pa pone un enfasis special riba e parti di arbeidvoorziening y gara e toro na su cacho. Ya caba trabaonan ta worde haci y dia 24 di maart Minister lo haya un rapport for di un comision cu a worde instala via un decreto ministerial na luna di December.
Esaki ta e inicio pa crea e confianza back cu mester existi den un departamento asina, cu por sigura cu esnan cu lo bin na promer lugar na remarke pa trabao ta nos yiunan di tera y esnan cu pa hopi aña ta biba na Aruba y ta traha segun permiso; pero tambe limita den su totalidad si ta posibel, permisonan cu ta worde pidi pa promer biaha (eerste aanvraag).
Na e momentonan aki tin hopi cosnan ficticio tumando lugar den e mundo laboral y un di e tareanan principal di e comision tabata pa identifica esakinan pa ora hiba e conversacionnan pa loke ta trata otorgamento di permiso di trabao, pa esaki bay segun e screening mas riguroso cu ta posibel, evitando asina cu ta bay duna promer permisonan pa cuponan di trabao cu lo por bay pa hendenan local of hendenan cu pa hopi aña tin un permiso y ta laborando aki na Aruba.
Intencion no ta pa bin cu un otro reorganizacion di Departamento di Labor, al contrario e tarea di e comision instala tabata pa tuma tur e rapportnan traha y saca e mihor di cada un di nan y pone esaki hunto pa mehora e funcionamento di e departamento.
