Loke mas pueblo di San Nicolas ta demanda ta cuponan trabao
Den encuentro cu Minister Mike de Meza:
ORANJESTAD (AAN) — Minister di Meza a bishita Distrito di San Nicolas, diasabra cu a pasa, den e marco di e compromiso cu Gabinete Mike Eman-1 tin, di ta cerca di pueblo. Den entrevista cu nos redaccion e dignatario a bisa nos cu Minister Presidente mr. Mike Eman, tambe ta reuniendo cu comunidad den e diferente Hulpbestuurskantoor y centronan di bario, manera por a tuma nota cu a sosode siman cu a pasa, y e compromiso ta pa cada un minister tambe duna consulta.
Diasabra Minister de Meza hunto cu su colega sr. Richard Visser a topa cu pueblo di San Nicolas den e edificio bieu di Centro Medico, y aya nan a scucha kico ta e problemanan cu tin den e comunidad aki, y con nan por yuda facilita nan pa busca solucion pa e problemanan cu a worde presenta.
Cupo di trabao ta e necesidad di mas grandi cu e pueblo di San Nicolas a mustra. Minister de Meza a duna di conoce cu hopi persona, durante e ultimo dos añanan a perde nan trabao y nan ta buscando empleo pero esakinan ta scars.
Haya trabao ta birando hopi dificil y peor ainda despues cu gobierno anterior a baha y cu Valero a drenta den un situacion dificil cu tur hende conoce, unda hopi contratista mester a laga tur trahador bay mescos cu a sosode den sector di turismo y hoteleria.
De Meza a subraya cu durante e ultimo tres pa cuatro luna gobierno ta trahando hopi duro pa purba drecha su situacion financiero y cuminza cu proyectonan pa pueblo for di Gobierno.
Den e cuadro di esaki Minister Sevinger ta trahando riba e proyectonan di infrastructura pa Playa y San Nicolas, y asina tambe tin plannan cu Minister Otmar Oduber ta bezig pa desaroya, y asina tin diferente pakete pa duna un empuhe pa rebiba Aruba su economia, y esaki ta locual e mandatario a splica den su encuentro cu habitantenan di San Nicolas, diasabra ultimo.
ARUBIANO MI TA.
Ministernan di aruba kumi man na mi curazon mi ta
pidi bosonan tur pone siquiera un bes den dos luna por ta riba un diasabra manda hendenan special na tur districto na aruba.pueblo a pone bosonan eynan pa boso traha pa aruba y pa boso pueblo y eynan boso ta haya tende kiko ta e problema ku pueblo ta pasando aden.danki