Mama cu criatura riba caya den madruga sin lugar di keda
ORANJESTAD.(AAN); Tin biaha un ser humano ta capta algo y por deduci cu no ta pornada manera den e siguiente caso e persona ta circula asina laat riba caya hunto cu un criatura.
Pa seguridad mihor reporta locual a wordo señala na polis. Den mayoria di caso ta resulta cu berdaderamente e persona tin problema pero e no ta expresa su mes facilmente na otro y e ta sconde su sufrimento. Tabata basta laat den marduga, segun e registracion ora e yamada a drenta tabata 3 or mas 30 minuut diabierna, cu lo a nota na Tanki Leendert, e ora ey, un hende muher ta cana cu un mucha chikito riba caya na altura di un snack truck.
Patruya di Noord a bay atende e yamada cu a drenta via central di polis.
Enberdad na e sitio indica polisnan ta topa un señora inicialnan J.F. di 39 aña, e ta bisa cu e no tin lugar pa biba y e no tin dak riba su cabez.
Tambe el a agrega di a confronta problema cu e homber y pa cual el a dicidi di bandona cas pa e bay hospeda serca un amiga biba na Madiki.
Pero ora el a yega na cas di su amiga, e no tabatin lugar pa e keda ya e cas ta full.
Debi cu no tabatin espacio mas el a dicidi di cana rond riba caya.
Y e no kier bay cas bek ya cu e ta teme pa su biba ya cu varios biaha segun e señora e homber a bise di lo mate.
Ademas e muher J.F. tambe tin problema cu su yiu homber.
Central di polis na diferente ocasion a trata di drenta den contacto cu instancianan pa asina resolve e problema di tanto e mama y su yiu.
Finalmente patruya a transporta J.F. y su yiu pa warda y a duna nan un espacio mientras den transcurso di mainta trempan a percura pa e señora bay na “Fundacion pa hende muher den dificultad”.
