Mester tin un discusion nacional pa asina saca un conclusion riba kico ta nifica un Aruba sin Refineria
Presidente di FTA:
ORANJESTAD (AAN): Presidente di FTA, Sr. Rudy Geerman ta kere cu mester tin un discusion nacional pa asina saca un conclusion riba un Aruba sin refineria. A señala cu na momento cu tin un dialogo nacional riba e tema specifico ey cu tur e gremionan envolvi, na e momento ey por saca un conclusion. FTA ta kere cu un Aruba sin refineria esey no solamente mester ta e discusion pasobra na momento cu ta dicidi un Aruba sin refineria ta nifica cu mester wak kico ta haci cu e daño grandi cu e refineria a haci e ultimo 70 aña of mas na Aruba.
A base di esey e por worde discuti. E ora ey conhuntamente por yega na un discusion. Na e momentonan aki si no tin alternativa claro cu si, a bisa. Locual ta genera rond di e refineria ta grandi y esey na e momento aki no por perde pasobra no tin otro pa tuma over su lugar.
Nan ta kere cu refineria mester habri y un esfuerzo mester worde haci. Naturalmente no por hari e refineria cueste loke cueste consecuentemente bin cu trabaonan barata, a subraya.
Segun Geerman, mester keda mantene e nivel di bida cu tin na e momento aki rond di e refineria y habrie. A enfatiza cu esey no ta bisa tur cos. Esunnan cu ta bin opera e refineria tin bon cla cu nan no por bay sigui procesa e mesun producto cu ta ser procesa na e momentonan aki.
Nan mester ta dispuesto pa inverti pa bay na productonan mas blanco. Esey ta rekeri un bon escogencia. Por ta esaki lo ta un compania completamente nobo of por ta un Valero cu un otro socio, a bisa. Lo mester bay inverti pa tin un refineria a largo plazo, a manifesta.
