Diario Online

Minister di finanza ta repasa consecuencianan di mal maneho di Gobierno anterior

Publication: Monday, 1 March 2010. Categoria: General

Relaciona cu nos mercado laboral limita:
ORANJESTAD (AAN) — Den entrevista cu nos redaccion, Minister di Finanza, Energia y Utilidadnan, sr. Mike de Meza, a splica pakico eigenlijk e situacion financiero di nos pais ta asina preta, y kico ta stroba un apertura mas amplio di nos mercado laboral. Esaki den cuadro di su bishita na e distrito di San Nicolas, unda el a topa cu varios ciudadano den e edificio bieu di Centro Medico, unda cu loke mas a resalta ta e demanda pa trabao cu tin cerca e poblacion aki.
“ E situacion financiero ta hopi dificil y como Minister di Finanzanan mi ta trece esaki dilanti. Nos ta druk bezig cu e presupuesto di Finanzanan Publico, y mi tin cu bisa cu ora nos mira e desastre cu e gobierno anterior a laga atras, e ta hopi grandi.

“ Nos a drenta den gobierno a bin haya un presupuesto supletorio di mas cu cien miyon y cu en total lo bira 150 miyon negativo, y tambe un deficit cu Land Aruba mester a paga pe na AZV cu a yega na 140 miyon Florin plus, riba di e 150 miyon cu e gobierno anterior a laga atras (como saldo negativo).

“ Door di e negligencia aki, e trabao malisimo cu e gobierno anterior a haci, awe nos ta worde confronta, ora nos ta bayendo door di e cifranan, cu un situacion financiero cu ta di casi 300 miyon Florin. E ta gewoon increible!” e dignatario a subraya.

Minister de Meza a señala cu AVP a mustra esaki ora e tabata den oposicion y den campaña, y cu e gobierno anterior a pone hopi medida riba lomba di pueblo y for di a aña 2002 e medidanan cu a worde tuma riba aumento di impuestonan (accijns, primanan di SVb, AOV, AZV) etc., y e lista positivo di remedi cu supuestamente mester a haci cu e gastonan di AZV lo mester a baha, pero e no ta cuadra y mas bien mester a bin cu BBO riba lomba di pueblo.

“ Cu tur e extra entradanan cu e gobierno anterior a haya cu ta riba un biyon Florin, tambe a tuma na fianza mas cu un biyon Florin, kiermen, nan a haya dos biyon Florin extra, y asina mes a laga un situacion financiero desastroso total pa cu e pais aki, locual nos ta confrontando cune”, Minister Mike de Meza a subraya.

De Mey a bisa cu esaki ta e motibo pa cual durante e prome tres pa cuatro lunanan despues cu Gabinete Mike Eman 1 a sinta, pueblo no tabata mira e gobernantenan tur dia.

“ Kere mi nos tabata traha di dialuna te cu diadomingo di mainta te anochi laat, pa purba coregi tur esaki, y nos a haya nos mes den un situacion cu Valero a manda tur contratista cas, debi na e posicion intransigente di e gobierno anterior pa sinta na mesa, mescos cu a pasa cu KLM, American Airlines, Carnival Cruise Line, y nos a bin ta trahando pa soluciona tur e situacionnan aki”, e dignatario a reitera.

Na e momentonan aki gobierno a logra pa KLM bin back, American Airlines kier aumenta su vuelonan, Carnival Cruises Line a confirma cu e lo bin back tambe y Valero a yega na un Settlement cu lo bay Parlamento aworaki, y ta parce cu tin basta interes pa e reapertura di e refineria.

“ Pues, riba tur e asuntonan aki nos mester a traha cu urgencia hunto cu un presupuesto cu no tabata existi, loke tabata terible pero cu nos ta biniendo cla cu esey tambe. Pero na mesun momento nos a bisa cu nos tin cu scucha pueblo, sinta cune na mesa, pa wak kico ta nan problemanan y wak con nos por facilita e solucion riba e situacion cu nan tambe a haya nan mes aden, door di e mal maneho di gobierno anterior, cu pa ocho aña goberna e pais aki”, Minister de Meza a remarca.