Diario Online

Minister di Turismo Otmar Oduber promoviendo Aruba den grandi na Merca

Publication: Tuesday, 2 March 2010. Categoria: Politica

Durante promocion impagabel den “Early Show” na CBS
Mas di 4 miyon televidente a mira “The Super Dancers”
ORANJESTAD (AAN): Cu un biento frieu suplando, e bailarinanan di “The Super Dancers” a haci nan presentacion dialuna mainta trempan durante “Early Show” na CBS. Aruba Tourism Authority hunto cu Minister Otmar Oduber a logra regla pa Aruba haya cobertura durante e show, specificamente durante e segmento di tempo. Aki e presentador a sali y e publico para pafor tur tabata bisti cu T-Shirt di “I Love Aruba”. A scohe colornan bibo di T-Shirt, manera ta berde, geel y blauw cla. Tambe tabatin borchinan promoviendo nos isla.
Na un dado momento e presentador a entrevista algun di esnan para pafor cu tambe a gaba nos isla masha. Por lo menos dos di esnan para pafor a conta cu nan a caba di yega for di Aruba y cu nan a keda encanta cu nos isla y su recursonan natural.

Teniendo cuenta e frieu cu ta haciendo den e dianan aki na New York, un promocion asina sin duda ta masha importante. “I would trade the New York snow into the Aruba’s sun” asina un di nos fanaticonan a duna di conoce para pafor di CBS studio.

Mester menciona cu na final e grupo “The Super Dancers” a haci nan presentacion. Nan a baila e cancion di Carnaval “Aruba Ariba” di Long Roy. “Nos a scohe e cancion ey pasobra den dje nan ta menciona Aruba masha hopi biaha y e ta duna nos un bon promocion” asina un di e bailarinanan a conta despues di e show.

E evento aki ta parti di un bishita di Minister di Turismo Otmar Oduber na Merca, pa promove e festival internacional di pelicula di Aruba ( Aruba International Film Festival) y pa reuni cu tur e representantenan di ATA pa presenta su vision.

A probecha di e bishita aki pa percura pa extra promocion atravez di “PR Stunts” manera e presentacion unico di awemainta. E cobertura a ser mira pa mas di 4 miyon televidente, kendenan ta tur tapa di frieu pero a goza di mira nos bailarinanan baila den nan trahenan carnavalesco, promoviendo nos isla turisticamente.