Minister Dowers ta celebra hubileo di oro di Cuerpo di Imigracion
ORANJESTAD (AAN): Siman pasa, Minister di Husticia y Enseñansa mr.drs.Arthur Dowers a asisti na un sacrificio di misa na Iglesia Immaculata Concepcion relaciona cu celebracion di 50 aña di existencia di Cuerpo di Imigracion.
Minister a felicita tur e trahadornan di Imigracion y tambe pueblo di Aruba pasobra cu Imigracion ta un deparamento hopi importante den e funcionamente di Aruba, di su sistema y tambe pa economia di nos pais.
E kier garantisa un calidad halto di imigracion y ta trahando duro riba esaki pa bin cu diferente cursonan cu ta bay worde duna den e siguiente lunanan nos dilanti. Minister a recorda nos cu e prome impresion cu un hende ta haya di nos ora e yega Aruba ta e trato na Imigracion.
Esaki semper mester ta un bon impresion, pasobra ta un chens so bo ta haya pa haci un prome impresion. Aunke cu tin bes tin hende kier drenta nos pais cu nos no ta desea di mira aki, e funcionarionan di Imigracion mester trata nan netchi y na un manera profesional.
Si un persona no por drenta pa motibonan legal anto tin e medionan tecnologico y e cantidad di personal cu ta garantiza y percura pa e pasonan tuma ta corecto. Minister Dowers a bisa cu tin plannan pa bin cu un evaluacion completo di e funcionamento di imigracion y e aspecto di seguridad di nos puertonan y despues di esaki lo evalua kico ta e pasonan cu mester worde tuma pa garantisa pa e calidad keda halto.
El a bisa cu tin un bon base y nos mester percura pa e calidad keda worde mantene.
