Mision comercial na Colombia y Panama tabata exitoso
Minister Michelle Winklaar contento cu e resultadonan
ORANJESTAD (AAN): E meta di e mision comercial na Colombia y Panama tabata pa explora posibilidadnan y oportunidadnan pa comercio, tambe pa atrae inversionnan entre Aruba, Colombia y Panama. Minister di Asunto Economico, Asunto Social y Cultura, señora Michelle Hooyboer-Winklaar a topa cu diferente mandatario Panameño y comerciante nan renombra na Panama durante di e mision di comercio organiza pa Camara di Comercio di Aruba. Aruba tabata presente na Expocomer 2010 cu a tuma lugar na Panama entre 3 y 6 di maart 2010, cu un delegacion di comerciantenan Arubiano, miembronan di Camara di Comercio di Aruba, Departamento di Asunto Economico, Comercio e Industria di Aruba y Departamento di Relacionan Exterior di Aruba.
Minister Michelle Winklaar a topa cu e mision comercial na Panama y entre otro a hiba conmbersacionnan cu e Ministro di Desarroyo Agropecuario, Sr. Victor Perez, Vice-Ministro di Comercio Exterior, Sr. Jose Domigo Arias, Director di Camara di Comercio di Panama, Sr. Adolfo Linares Franco, Presidente di e comision organizador di Expocomercio 2010, Sr. Inocencio Galindo Navarro, Vice Presidente di Camara di Logistica y Transporte di Panama, Sr. Albert White ademas di diferente comerciantenan Panameño.
E comerciantenan Arubiano cu a compaña e mision tambe a topa cu diferente comerciante nan Colombiano dia 1 y 2 di maart na Colombia y na Panama den e siguiente dianan pa intercambia posibilidadnan di comercio bilateral.
Tin diferente producto y servicionan cu por worde intercambia entre e paisnan aki cu Aruba. E posibilidadnan aki lo worde analisa door di e comerciantenan y departamentonan di Gobierno conhuntamente cu Camara di Comercio di Aruba.
Tanto Colombia como Panama ta hibando un maneho comercial dirigi na exportacion y ta produci productonan di calidad halto pa exporta esakinan entre otro den region di Caribe. Dia 4 di maart Minister Michelle Winklaar a topa cu funcionarionan halto di COPA Airlines, entre nan cu e CEO di e aeroliña, esta Sr. Pedro Heilbron pa papia di e importancia di e aerolinea aki den cuadro di un plan pa aumenta comercio entre Panama y y Aruba.
Combersacionnan a bay hopi fructifero. Embajada Hulandes na Bogota-Colombia, Consulado Hulandes na Panama y Embajada Hulandes di Costa Rica a duna un gran aporte na exito di e mision Comercial di Aruba.
