Diario Online

Na Simeon Antonio hendenan ta sali for di nan cas scondi, pa e ladronnan no sa cu nan no ta na cas

Publication: Wednesday, 10 March 2010. Categoria: General

Segun Minister Dowers
ORANJESTAD(AAN): Un grupo di habitante a bay cerca minister Arthur Dowers pasobra nan tin problema serio den nan bario rond di Simeon Antonio cu algun conoci di polis. Awor e dos rumannan Rosario ta sera y e bario tin un alivio grandi. Esey ta e motibo tambe pakico nan a colecta firma y entrega esaki na polis y minister di husticia. Den entrevista cu minister Arthur Dowers el a splica cu el a ricibi un carta die habitantenan di bario di Simeon Antonio, den cual nan ta duna un splicacion amplio riba e problemanan di ladronicia y choller cu tin den e bario.
Tin tambe un tipo di terorismo ta tumando lugar tambe door di algun hoben cu for di basta aña ta den droga.

Nan ta horta den tur e casnan y nan ta uza loke nan horta pa yega na placa pa cumpra droga.
E Minister a bisa cu ultimo simannan e ta ricibi hopi bishita di hendenan cu no tur ora kier sali pafo tampoco door cu nan tin miedo, pero si kier denuncia e hecho cu tin un problema grandi den e bario di droga y hortamento.

E mandatario a priminti e habitantenan cu e ta bay actua na un forma hopi serio.
El a bisa si cu lamentablemente el a constata cu tin hopi cos cu for di varios aña pasa a bay for di man.

Pesey den pasado fraccion di AVP a critica e maneho cu tabata tin pa loke ta hubentud di pais di Aruba.

Aunque aworaki ta laat pa esnan den e bario cu ta causa e problemanan, awor mester cuminza for di trempan pa e muchanan no cay den mesun problemanan cu e grupo problematico.
Dowers a sigui bisa cu mester señala loke ta bay robez den e barionan y guia e famianan den e barionan.

“Si nos laga cosnan bay for di man, bo ta yega na e excesonan cu nos tin awe”, segun e Minister.
El a sigui bisa cu ta impresionante pa tende ora famianan ta contabo cu hendenan tin miedo di drumi den nan propio cas.

E hendenan ta sali scondi for di nan cas, pa e ladronnan no sa cu nan no ta na cas.
Tin hende cu ta worde agredi door di hende cu ta drenta nan cas pa horta, unda cu si nan bay entrega un denuncia nan ta worde menaza of e malhechornan ta dal nan cu bloki etc.
Banda di tur esaki hende grandi ta biba morto spanta den nan cas, pa e hecho cu tin algun hende cu ta sinti cu nan a tuma e bario over.

Segun Minister Dowers, hopi di e habitantenan di e bario ta sinti cu husticia y autoridadnan a laga nan na caya.
“E criminalnan mester haya un señal hopi cla, cu nos lo bay nan tras, nos lo persigui nan y nos lo pone nan dilanti di husticia”, segun e mandatario.