Diario Online

O.P.P.A. ta firma acuerdo awe cu Gabinete Mike Eman

Publication: Wednesday, 10 March 2010. Categoria: General

Otro inhusticia di gobierno di MEP ta worde drecha pa Gabinete Eman
ORANJESTAD (AAN): Awe porfin, pensionadonan di A.P.F.A. por haya husticia despues cu na aña 2008 nan a worde nenga esaki pa motibo cu a bay accion hunto cu sindicatonan. Cu gabinete Mike Eman e biento positivo a yega back nos isla caminda cu no tin lugar mas pa e tipo di inhusticianan aki. Na 2008 sindicatonan, hunto cu O.P.P.A, pensionadonan di APFA, a bay den accion pa aumento di salario/pension, despues di un periodo largo di negociacion cu nunca tabata avansa.

Durante e accionan e trahador y pensionadonan a pasa den hopi insulto y menazanan cu a haci e accionan di 2008 un di esnan di mas bergonsoso den historia moderno di Aruba. E intencion originalmente tabata ta cu e pensionadonan di O.P.P.A. a haya e mesun aumento cu e trahadornan di e sindicatonan.

Despeus di hopi negociacion y concesion for di parti di e trahador y pensionadonan, e partidonan a yega na un acuerdo caminda cu nan lo haya un aumento bruto di 105 Florin.

Te na momento cu gabinete Nel Oduber a firma e protocol cu sindicatonan y O.P.P.A., e comprondemento ainda tabata cu e trahador y pensionadonan lo haya e mesun aumento ariba nan salario/pension.

Pero den madruga, gabinete Nel Oduber a tira e pensionadonan e famoso “fast-ball”, engñandonan e pensionadonan den e protocol, caminda cu nan a haya unicamente 70% di e cantidad cu nan a yega na un acuerdo cu ne.

For di e tempo ey e hecho aki a keda un problema y O.P.P.A. a keda purba pa mas cu un aña pa drecha e asunto aki, pero Gabinete Nel Oduber nunca a mustra disponibilidad ni capacidad pa drecha e asunto aki pa por yega na un solucion.

Cu un gobierno nobo O.P.P.A. a sinti cu lo por tin mas oido pa nan preocupacionan y a acerca gabinete Mike Eman pa wak si nan ta disponibel pa drecha e inhusticia aki. Cuminsamento di e aña aki O.P.P.A. a drenta den dialogo cu gabinete nobo, Gabinete Mike Eman, pa por cuminsa un proceso pa drecha e inhusticia cometi na 2008 pa gabinete Nel Oduber.

Gabinete Eman a laga O.P.P.A. sa cu den nan opinion, henter e asunto aki ta no a bay corecto, no tabata husto y no tabata loke pensionadonan tabata merece y a firma e protocol p’e. “Nos gobierno lo haci lo corecto y lo drecha e inhusticia aki,” segun palabranan di Prome Minister Mike Eman.

Cu e disponibilidad di gabinete Mike Eman ariba mesa e partidonan a drenta den dialogo pa drecha e asunto aki di e manera di mas mihor pa tur dos banda. Ayera, conseho di ministronannan a bay diacuerdo pa drecha e inhusticia cuminsando for di januari 1, 2010.

E protocol entre gabinete Mike Eman y O.P.P.A. lo worde firma awe mainta pa mas o menos 9′or den sala di conseho di ministronannan na bestuurskantoor.