Papi Wiersma y Hemraj Mulai lo representa Aruba den Arnold Schwarzenegger Classic
ORANJESTAD (AAN)— Diario Deportivo tabata presente ayera atardi na Aeropuerto Internacional Reina Beatrix caminda nos por a haya e oportunidad pa topa cu un delegacion di e deporte di Body Building cu a Sali rumbo pa Columbus, Ohio, USA, pa participa den e famoso competencia Arnold Schwarzenegger Classic, un evento patrocina pa e famoso actor di peliculanan di accion y actual gobernador di California tambe conoci como “Gobernaitor”; e evento aki ta un olimpiada cu participacion di diferente deportenan.
Aruba lo wordo representa pa e atletanan Hemraj Mulai cu lo ta participando den e categoria Bantam Weight (bao di 70 kg) y e conocido Papi Wiersma kende lo ta compitiendo den Light Weight (70 Kg).
Hemraj, representando Hardcore Gym, ta wordo acompaña pa Giovanni Arends y Rene Wild (Coach), Giovanni Arends banda di bai como presidente di ABBPA, tambe lo fungi como hurado den e competencianan.
Papi Wiersma ta wordo acompaña pa Arthur Comenencia y Carol Alders como su coach y e ta representando e Gym House of Pain.
E delegacion aki tambe lo wordo apoya pa e atletanan Guiver Schouten, Sigmond Silvania, Keneth Seraus y John Rios.
Ariba e fecha 5 di Maart, lo tuma lugar e competencia di Pre-Judging y dia 6 di Maart lo tin e competencia final. E delegacion lo regresa Aruba dia 9 di Maart. Ariba e combinacion di fotonan por aprecia e delegacion prome cu nan a aborda nan avion rumbo pa Estados Unidos.
