Parlamentario Booshi Wever purbando pa tapa su mal maneho den AZV
Minister di Salud Publico,dr. Richard Visser:
Sistematicamente e ta desinformando pueblo!
ORANJESTAD (AAN): “Esaki no ta mi style, pero mi no por keda keto y laga Booshi Wever sigui papia cosnan cu definitivamente no ta berdad”, asina Minister dr. Richard Visser a cuminsa bisa como reaccion riba e ultimo declaracionnan di ex-Minister Booshi Wever relaciona cu e cambionan den AZV. E minister nobo ta den proceso pa trece cambio y ta hayando hopi oposicion for di e fraccion di MEP. Minister dr. Richard Visser ta haya hopi lamentable, cu na un forma delibera, cu Parlamentario Wever ta desinformando e pueblo.
Pa cuminsa, Minister dr. Richard Visser ta desmenti cu el a paga e miembronan di directiva di AZV e suma di 100 mil Florin cada un pa tuma nan retiro for di e organizacion. Aunke e no ta haya etico pa menciona na kico partidonan a yega cu otro, e por sigura cu hunto mes nan no ta yega 100 mil Florin!
Ta bon pa menciona aki cu e ex-Minister Wever mes a laga un acuerdo atras na September 2009, algun dia prome cu eleccion, ora cu el a core firma un contract cu e dos directornan di AZV. Ey a menciona sumanan astronomico pa kibra e contract y den esaki e minister nobo a logra sera un acuerdo pa un suma hopi mas abou.
Es mas, Parlamentario Wever ta menciona cu su dos amigonan den directiva tabata den directiva di Arubus tambe, siendo cu esaki no ta berdad, pues un otro mentira di e persona cu awor kier atacha credibilidad di otro.
Pa loke ta trata e realocacion di drs. Anco Ringeling como director di AZV, esaki no ta trece ningun gasto extra pa e organizacion. Al contrario, cu su realocacion AZV ta scapa placa pasobra ex-Minister Booshi Wever a kit’e di su posicion 8 aña pasa pero a lage como un consehero den AZV manteniendo su salario y beneficionan di director.
Es mas, no ta e Minister nobo a re-alok’e den su posicion tampoco, sino e directiva. Parlamentario Wever mester corda cu ta 5 miembro di directiva tin y Gobierno ta apunta solamente 2 di nan.
Pa loke ta trata e postulacion di Bart Kool, mester tene cuenta cu aki ta trata di un berdadero experto den e ramo aki cu mas di 20 aña di experiencia y cu a traha pa AZV desde aña 1994 pa 2005. E ta worde considera como un di e poco hendenan cu conoce e maneho y cifranan di AZV. Berdad cu na un dado momento e tabata e Gerente General di Visser Trading, pero el a tuma su retiro y awor ta forma parti di e ekipo gerencial di AZV.
Cu Parlamentario Booshi Wever awor ta sali ataca Minister Visser riba AZV como tal no ta aceptabel, specialmente pasobra e minister nobo a hereda e 8 añanan di mal maneho y lo mester dedica hopi tempo awor pa drecha loke a ser laga atras.
Durante 8 aña ex-Minister Wever tabatin posibilidad pa baha e gastonan di AZV, pero e no a hacie. Alcontrario, e gastonan di operacion a sigui subi so! Y riba dje el a logra bay guera cu tur e dunadornan di servicio, dañando e relacion entre AZV y tur esnan cu ta bende servicio na su pacientnan. “Ta cu e tipo di retonan asina awor nos ta atendiendo a base diario.
Constantemente nos tin reunion cu e dunadornan di servicio pa por yega na un apertura den e relacionnan, estrechando tur tipo di acuerdo di cooperacion nobo. Algo cu no a existi durante e ultimo 8 añanan”, segun Minister dr. Richard Visser.
E mandatario ta convenci cu dentro di masha poco elo por anuncia reduccion den e gastonan di AZV, como resultado di e reunionnan cu ta teniendo ultimamente.
“Mi no tin tempo pa bay keda contesta Parlamentario Wever riba su mentiranan, pero mi djis kier pa pueblo sa cu e ta desinformando e publico pa e purba scapa su mes di e maneho cu el a hiba den Salud publico durante e ultimo 8 añanan”, asina Minister dr. Richard Visser a termina bisando.
E ta haya si cu e ex-Minister cu pueblo a manda cas durante e ultimo eleccion tin hopi curashi di sali cuestiona su maneho siendo cu e sa bon cu ta pa su mal maneho den AZV mes awe e ta sinta den stul di oposicion den Parlamento.
Y riba dje, Booshi Wever tin un record den gañamento, for di hopi aña pasa caba, pues e tene cuenta cu si e kier hiba oposicion pa purba tapa su mal maneho e lo tin di hacie cu hechonan y no cu mentira!
manolo
“esey no ta mi style”, Sr,. Vissser mester informa comunidad cual ta su style, pasobra den 4 luna di gobernacion e unico logro den salubridad ta practicamente nada
Dr. Jorge López Dorado
Ta incomprensibel cu un persona cu pa tapa su ignorancia a gaña pueblo cu diploma falso, cu a hasi hopi daño na e moral y credibilidad di e grupo medico, cu a traja como ministro di salubridad sin comprende qui salud quier gnifica y a laga AZV den un debe enorme ainda tin e coraje di papia. E uso di un diploma falso pa logra un cargo alto ta de su mes un acto di corrupcion enorme y mester tin consecuencia , al menos esta persona no mester sigui strobando y e autoridad competente mester exigí su retiro.
Dr.Renato van Putten
Booshi no a hasi nada pa cu salud di nos pueblo, a cambio e unico cu e a logra ta desgusto , desunion , mal maneho y peligra e salud di nos pueblo. manera no ta basta e tin e corahe awor pa ataca y questiona un otro cu apenas tin algun luna ta inventirisa tur e bagamunderianan cu e a hasie den AZV y nos cuido medico. bo no a traha , bo a dana so. Duna un otro e oportunidad, cisas asina menos hende ta muri y mas cuido por wordo duna