Persona a bira malo den Casino
ORANJESTAD (AAN): Diadomingo den oranan di atardi, esnan cu ta trahando den un Casino local, a mira con diripiente un persona local cu tabata pasa momentonan agradable eyden, a bira malo.Inmediatamente a yega cerca, y a bin nota cu e ta pasando den problema cu su curazon. Pensando cu por ta un atake el a haya, mesora a notifica Polis como tambe Ambulans. Paramedi conan a yega mesora, y inmediatamente a pone machine na su curpa, pa asina monitor e batimento di curazon. Despues di a stabiliza e pacient, a bay mesora cune pa Hospital.
Algun persona a indica, cu aparentemente el a perde tur su placa den Casino, y pesey el a bira malo. E storia ey sinembargo no a worde confirma.
Na Hospital, el a worde pasa pa Hart-Kamer, unda a haci chekeo di su curazon, y el a stabiliza bastante. Na final e por a hasta lanta back, cana, y riba su propio forza a regresa cas.
