ORANJESTAD (AAN): Ta hopi fresco den nos mente con un par di dia tras di otro Aruba a worde sacodi pa morto den trafico y Minister di Justicia hunto cu mando Policial a pone hopi enfasis ariba e echo aki cu e trafico ariba Aruba mester di mucho mas atencion, pero hopi biaha ta asina cu e propio conductor ta esun cu ta haci e trafico bira peligroso.
Riba e potret cu ta compaña e articulo aki, nos por mira un manehador di Quadracer ta pasa auto caminda cu tin stepi blanco den mitar di e caminda y cu ta indica cu ta un espacio prohibi pa vehiculonan di 4 wiel pasa otro.
Pa colmo cu e mes un manehador aki tabata core rukeloos ya for di Pos Chikito caba y tabata pasa e autonan sin pensa cu e ta poniendo e trafico den peliger y su mes tambe. Ohala cu mas atencion Policial worde poni ariba e camindanan principal pa yuda combati e coremento duro y pa loco. No ta cera cruzadanan ta e solucion pa baha e cantidad di morto den trafico, ta medidanan rigoroso cu mester bini cune, especialmente pa hendenan cu ta maneha malo y bou di influencia. Esakinan ta e promenan cu mester worde kita for di lista.
