Pilarnan Di Cultura Arubano Presente Na “Cantando Su Pueblo”
Padu Lampe, Maybelline Arends-Croes y Lio Booi…
ORANJESTAD (AAN): E gran actornan tras di e realisacion di nos simbolonan nacional manera nos himno y bandera, pero tambe promotornan incansabel di nos cultura y folklore, tambe lo tey presente durante e gran concierto “Cantando pa su pueblo”, pa demostra apoyo y aprecio total na un hoben cu ta haciendo un trabao impresionante di mantene nos herencia cultural y identidad bibo.
Juan Chabaya “Padu” Lampe, Maybelline Arends-Croes y Hubert “Lio” Booi, ta ehempelnan bibo di e manera ta con mester duna contenido y consistencia di loke ta arte en general pero tambe di loke nos antepasadonan a laga pa nos sigui conserva y preserva.
E personanan aki, cada un, un tesoro cu un balor grandisimo pa nos pais, semper tabata tey den prome fila pa apoya Edjean Semeleer den tur proyecto cu e presenta, hunto cu nan famia. Specialmente den tur su conciertonan.
Danki, gran parti na nan, nos historia literario y musical ta asina rico, y danki na nan tambe cu dia 19 di Maart proximo, Edjean por presenta un repertorio cu bunita piesanan na Papiamento.
Bin demostra bo apoyo mescos cu e 3 baluartenan aki ta haci, na un hoben Arubiano cu ta mantene nos identidad bibo.
No ta importa bo rasa, color, religion, di ki barrio bo ta y ki nacionalidad bo tin, ta den un gran union nos lo celebra e culminacion di e gran celebracion di nos himno y bandera durante e concierto di gala “Cantando pa su pueblo” den e prestigioso Crystal Theatre.
Bin disfruta di bo herencia cultural y sinti bo orguyoso di ta yiu di e baranca aki.
“Cantando pa su pueblo”, un concierto netamente Arubano, den cua e talento local lo worde exponi un bes mas den su miho forma. Percura pa bo tey!
