Planta Di Reciclahe Di Ecotech Ta Un Muestra Cu Aruba Por Diversifica Su Economia
Prome Minister mr. Mike Eman:
ORANJESTAD (AAN) — Nos redaccion a entrevista Prome Minister mr. Mike Eman, relaciona cu e planta nobo di reciclahe, cu ta un inversion miyonario di un compania priva.
E proyecto aki ta pertenece na Ecotech Freezone, y como cu gobierno tambe tin plan pa futuro, pa loke ta concerni e area di Barcadera y waf, nos a puntra e dignatario con e ta mira e iniciativa priva aki.
“ Mi ta kere cu e ta un di e proyectonan cu ta duna evidencia cu nos tin e oportunidadnan caminda cu nos por diversifica nos economia. Unda cu nos por crea actividadnan economico nobo, basa tambe riba e desaroyonan nobo y moderno di pensamento riba reciclahe, riba energia berde y tambe henter e pensamento cu nos por procesa cada pida producto, hasta e ultimo cu nos ta kere cu ta un desperdicio”, Prome Minister a menciona.
El a agrega cu esaki ta un iniciativa di Meta Corporation, den forma di e expansion grandi di Ecotech, y e ta un muestra di e vision di empresarionan cu ta para tras di e proyecto aki.
“ Y sigur bo ta mira e entusiasmo den esnan cu ta maneha e compania aki, y cu ta esnan cu a desaroya e proyecto aki caminda cu cada pida tipo desperdicio den nos pais ta haya un balor comercial. Un cantidad grandi di container ta worde exporta y mas lo bay worde exporta di carton, papel y tur otro tipo di producto cu despues cu nan yega na final di e ciclo te na sushi di dump, lo haya un balor acerca, y aki nan ta reparti e pa asina nan por empakete y dune su balor comercial tambe riba e mercado internacional”, e dignatario a subraya.
Kiermen, e ta algo importante cu ta bay yuda tene Aruba limpi, e ta haya un balor comercial y esey naturalmente ademas di trece divisa ta genera trabao pa nos hendenan, segun e dignatario.
El a felicita Meta Co., y Ecotech cu su team dinamico. E dignatario a subraya cu sr. Kelkboom tin hopi conocimento riba e materia aki como sr. Halabi, y e zona liber cu tin un rol importante den e proyecto aki.
