Posibel intento di atraco evita na ora
ORANJESTAD.(AAN); Danki na tanto polis y ciudadanonan atento lo a evita un intento di atraco. Na diferente ocasion a wordo treci dilanti cu polis mester ta amigo di comunidad, mester crea confianza pa momento ciudadano nota cosnan straño ta bay of ta tuma lugar, pa reporta esaki na autoridad mesora. Den mayoria di caso ta preveni pa scapa bida di esnan inocente. Dialuna mainta trempan pa 6’or un patruya den cercania di un tienda na Tarabana den Caya Betico Croes por poco a bira blanco di atraco. Ora cu e polisnan ta yegando mas cerca , un cliente a sali for di e tienda Tarabana Food Store .
E cliente a bisa polis cu paden tin un tipo bisti tur na preto y e ta hasi fastioso. Ta drenta informe via central di polis na momento cu polis a ricibi e tip for di e ciudadano. Segun e centralista di polis, tin un homber sospechoso den Tarabana Food Store.
Polisnan a drenta den e Food store y en berdad nan a nota presencia di e homber cual ta cuadra cu e descripcion. Nan a keda observa e tipo aki na un distancia pa evita di lanta sospecho.
A constata cu e tipo tin cantidad di articulo den su man y ora e homber a bay na caha, a resulta cu e no tin placa pa paga e articulonan.
Polis a observa cu e homber tabatin un obheto bao di su camisa y mesora agentenan a actua y a resulta cu ta trata di un hoben naci na Republica Dominicana di 19 aña inicialnan J.E.
Den su poder a descubri no uno pero dos cuchio.
Ora cu a bay pafor pa pone den boei y tambe hinke den auto di patruya, un ciudadano a tip of e agentenan cu tin un auto color blanco banda di e auto di polis. Den e vehiculo tin un homber sinta cu ta hunto cu J.E.
Polisnan mesora a acerca e chofer inicialnan D.K. di 51 aña y a puntre e homber si e conoce J.E., su contesta tabata “Si” nan dos ta hunto.
E contesta di D.K. tabata suficiente pa e baha for di e auto y polis a listra e vehiculo y bao di asiento a descubri un arma blanco scondi y e obheto a keda confisca.
Den saco di Carson di J.E. tambe a descubri un sakito cu ta contene droga (substancia parecido na piedra). E detenido J.E. a reacciona mesora bisando e piedra ta pa su propio uso.
