Prome Minister A Pidi Banconan Pa Yuda Impulsa Mas Inversion

Door di bira mas flexible cu fianza pa empresario:

ORANJESTAD (AAN) Manera ta conoci, diaranzon cu a pasa, Prome Minister mr. Mike Eman a sinta cu Asociacion di Banco di Aruba.

Den entrevista cu nos redaccion e dignatario a duna di conoce cu gobierno a yega na e punto cu e proyectonan di restauracion y renovacion di e centronan di ciudad di Oranjestad y San Nicolas, ta den un fase hopi avanza. 

Cu e proyectonan aki tambe esnan di infrastructura, e.o ringweg ta den un fase tambe hopi adelanta, gobierno a haya importante pa comparti cu e banconan local e desaroyo aki, kico ta e oportunidadnan cu esaki ta bay crea y cual ta e posibilidadnan pa banconan stimula e proceso aki.

Prome Minister a bay back na e periodo 1986 cu Aruba a conoce un crecimento economico, cu hopi a pensa cu e lo no sosode, y pesey hopi Arubiano no a participa den e oportunidadnan economico asina hopi manera e gobierno e tempo ey tabata desea.

Segun Premier Eman, gobierno no kier pa algo similar sosode, pero mas bien pa tur hende ta hopi conciente cu e renovacion y inversionnan cu nan ta bay haci den centronan di ciudad, lo habri oportunidadnan grandi pa empleo, pa desaroyonan economico y comercial nobo, pa empresarionan, etc., y nan kier pa banconan sostene nan cu credito menos caro cu ta e caso te awor, cu facilidadnan di informacion, y pa yuda nan den nan “business plan”, pues pa yuda nan desaroya henter nan planeamento pa nan inversion, stimula nan den un sentido positivo y pa no pidi nan pa para borg pa tur cos ni mara nan cu man cu pia, na momento cu nan ta bay busca fianza, pero duna nan un espacio.

Prome Minister a keda cu impresion cu e banconan ta hopi interesa pa tuma e oportunidad aki y duna un impulso na e cantidad di proyectonan.

Mescos cu Prome Minister a papia cu e banconan e lo bay papia tambe cu tur e organizacionnan den nos comunidad, pa tin un influencia den e informacion cu mester bay na e empresarionan potencial y esnan cu ta existi caba, pa nan haci uso di e oportunidadnan hopi grandi cu ta bay habri.