Protocol firma pa yuda agricultornan y criadornan di bestia
ORANJESTAD (AAN): Durante conferencia di prensa di Gobierno, Minister di Labor Otmar Oduber a trece dilanti cu riba e dia a inicia cu e prome firmamento di dos protocol cu ta tuma lugar den e caso aki entre gabinete Mike Eman y departamento di DOW di un banda y WEB Aruba N.V di otro banda. Esaki pa cu un servicio adicional cu Gobierno kier bay duna via LVV na agricultornan aki nan Aruba y esnan cu ta cria bestia na Aruba. Segun e mandatario, e ta expresa un palabra di satisfaccion y di gratitud na e personal di WEB Aruba N.V y tambe na e ambtenaarnan di DOW y LVV, kendenan a sa di sinta hunto y kibra cabez, pa pensa formanan creativo cu lo por existi, cu por yuda e gruponan den comunidad cu ta productornan di diferente producto di cuminda etc. aki na Aruba.
E ta un ayudo necesario, mirando tambe actualmente e temporada di secura cu tin.
Ora bo pasa banda di e damnan bo ta ripara cu e yobida e aña aki no tabata tanto cu e agricultor y e criadornan di bestia por a uza esaki.
E grupo a sinta hunto y despues di a analisa diferente aspecto, a yega na e conclusion cu tin un manera pa yuda, caminda cu a yega na un prijs preferencial pa e agricultor y criadornan di bestia por continua cu nan labornan.
A bin cu e idea creativo unda cu e awa cu na WEB ta worde yama ‘spoelwater’ cu ta worde tira riba caminda y ta bay perdi, por worde uza pa LVV.
LVV e ora ey lo percura pa trece e awa aki pa e criadornan di bestia y agricultornan cu tin mester di dje.
Mescos ta sosode cu awa procedente di e waterzuiveringsinstallatie na Parkieten Bos.
E protocol firma conhuntamente cu Volksgezondheid lo percura pa e awa cu worde uza, mescos cu ta worde haci rond mundo, por bay pa cierto plantacionnan.
Esaki ta bay yuda cu e factibilidad pa nan sigui produci na Aruba na momento cu tin secura.
Minister de Meza y Minister Sevinger a coopera na e idea pa bin cu un manera creativo pa yuda nos agricultornan y nos criadornan di bestia.
