RED: Un modelo politico di puro mentira!
Mas bo laga un hende papia, mas e ta reda su mes. Awor no ta solamente Rudy Lampe ta desfila su mes como e ganador mas grandi den e historia politico di Aruba, sino cu el a lastra un man yen di hende bay cune, y tur bisti na blanco! Si ta un di nan so a papia mentira, y ta sigui ripitie, bo por bisa: wel, ta e politico fracasa so ta responsable, pero evidentemente ta tur cu a papia na radio, na Television y den corant, a sigui e mesun modelo di mentira implanta pa e campeon di nan tur: Rudy Lampe.
Awe DIARIO ta publica e proces-verbaal di e security guard cu tabata tey pa pone orden e anochi cu Rudy Lampe y su gang di mentiroso a bay forma bochincha cayehero bisti manera fantasma dilanti di Convention Center. Ningun di e personanan cu a acompaña mister mentiroso a bisa e berdad di loke a pasa. Awe, tur hende por lese cu nan mesun wowonan y compronde e peligro di un partido cu tin un fundeshi asina grand! di gañamento.
No ta awor Rudy Lampe a siña gaña! Cu e rabia cu e tin den su curpa pasobra nan a detene despues di e actonan di violencia cu el a provoca durante e manifestacion tristemente famoso aya, el a cuminza organiza su ingreso den politica, asumiendo e Presidencia di e Comision supuestamente di ‘Berdad’, pero cu a resulta un Organizacion di mentira poco biaha iguala den nos historia politico.
Pasando man pa e filosofia Nazi cu si bo ripiti un mentira diez biaha bo por convirtie den un berdad, el a kere cu e campo tabata fertil pa e construi un partido riba e base ey. Nos tur ta corda con el a gaña cu e De Veernan a tira boter riba e manifestantenan for di un camber di nan hotel, con el a inventa mentira tras di mentira contra algun prominente di AVP, en especial contra Henny, kende den su mentalidad troci e ta conserva como e culpable di cu el a bay cera, y den tanto otro ocasion y contra tanto otro hende, cu pa loke ta trata credibilidad, esey a bandone hopi tempo pasa!
Cu awor e kier bin splica kico ta ‘libertad di expresion1, djis pasobra den DIARIO e no ta haya mas espacio pa sprey su letania di mentiranan, ta propio di un mentalidad enfermo, narcisista, y completamente bruha. Libertad di expresion no ta un regalo, e ta un logro democratico di e medionan cu ta kere firmemente den dje y tabata y ta sigui dispuestp di lucha pe cu tur nan forza. E no tin portanan habri pa cualke mentiroso bin impone loke un medio por o no por publica o had, semper di acuerdo cu e Leynan vigente di nan comunidad. Tur corant, hasta e mas mediocrenan y e mas comprometi nan cu nan envidia, tin e libertad di publica loke nan ta considera apto pa publicacion. Ningun gañado por impone su mes riba ningun medida pa obligue recoge su macuto di mentiranan y sprey nan manera un veneno den poblacion. Esey no ta forma parti di e Acuerdo di Chapultepec!
E trayectoria di DIARIO ta bon conoci. Pesey nos a conserva semper e lugar number un di preferencia cerca nos Pueblo. Aki no tin lugar pa mentira, pa inventonan fantasioso, ni pa e afan di cualke embustero usa su paginanan pa impone su structura di mentira.
Cu Betico nos a bay guera contra tur loke tabata atenta contra e derecho di Pueblo pa busca su liberacion, y na fabor di MEP a nenga di publica asuntonan cu tabata atenta directamente contra e lucha pa logra nos Status Aparte! DIARIO, como aliado di MEP e tempo ey, a enfrenta enemigonan peligroso y poderoso, algun casi mes mentiroso cu Rudy Lampe, pa faborece Betico y su partido den e logro di e Status Aparte cu awe nos ta disfruta.
Na DIARIO nos ta para banda di e berdad, manera cu e ta exist! y no den loke e exponentenan di mentira kier cambie. Awe, DIARIO ta duna un demostracion mas, publicando e .proces-verbaal cu ta splica exactamente con e grupo bisti na blanco di Rudy Lampe a bay haci bochincha riba un propiedad priva dilanti di un evento pa bishitantenan.ilustre di e medionan di comunicacibn di nos hemtsferio, cu imposicion y violencia. E ta splica tambe di e manera cu nan a procede, batiendo riba e bentananan di e bus cu tabata transportando e bishitantenan pa e centro di convencion, spantando nan, y con un Inspector di Polls aparentemente comprometi cu e filosofia di mentira y violencia propaga pa Rudy Lampe y su gang di mentirosonan a dal un security guard na su schouder y na su parti intimo.
E security guard a entrega tambe na polls un copia di e raport medico cu ta describi e Iesion cu el a sufri. E keho entrega y transcribi den e proces-verbaal ta conta un storia completamente diferente di esun cu e bochincheronan a bay grita na radio y television. E relato ey ta splica, ademas, pa tur esnan cu sa lesa entre linea, pakico polis no a traha un raport di loke a sosode! Por lo menos, te unda cu mi sa e raport ey no ta existi! Compincheria entre coleganan? Esey ta pa Cuerpo Policial mes dilucida!
Na Aruba nos no ta bay tolera e tipo di camaraderia ey entre polisnan ora cu un di nan comete un pifia, of un abuso di poder contra cualke ciudadano di nos isla, usando un uniform cu e ta kere ta permitie maltrata hende. DIARIO no tin tolerancia pa e tipo di actuacionnan ey y lo denuncia nan semper, sin importe kende ta envolvi. Ta toca e Comisario di Polis y e departamento di Servicionan Interno di cuerpo policial investiga e asunto y tuma e medidanan necesario pa e clase di abusonan ey no ripiti contra ningun hende na Aruba. Nos ta un parti di Reino Hulandes y un extension di Europa den Caribe, y como tal tin e derecho di acudi na e organonan mas halto di husticia di e Continente ey, loke DIARIO ta considerando haci tambe! .
Mentira por ta rapido, pero berdad semper ta alcanze na caminda pa derote! Asina Ruday Lampe ta keda exponi como e mentiroso mas grandi cu politica na Aruba a yega di produci!
