Hopi hende a keda contento dia cu Rudy Lampe a anuncia cu e ta tuma su retiro di politica. Dia mi a tende mi a pensa cu lo tabata bon si e keda den politica, pa nos scucha un voz diferente y planteamentonan di otro skina. Mi a hasta bise esey den un email cu mi a contesta di dje. Pero, mirando su actuacionnan cada biaha mas descabeya, mi a cambia di opinion y ta convenci awor cu e miho cos cu e por haci ta tuma su retiro di politica y busca otro cos di haci. Como sacerdote mi no kier mire mas, pasobra tur loke e por haci lora den su pañanan preto ta daña pa nos religion. E mesun opinion ey mi tin di Obispo Seeco, kende nunca a convencemi. Pa Obiso Ellis mi tabata tin un gran admiracion y tabata sinti cu su presencia tabata un contribucion real na e sentimento di paz, consuelo y spiritualidad cu nos ta busca den nos religion.
Un par di anochi pasa Rudy Lampe acompaña pa un man yen di radical di su partido a bay haci su payasadanan na porta di un recepcion cu DIARIO tabata ofreciendo na e representantenan di e medionan mas importante den nos region, manera Washington Post, La Nacion di Buenos Aires, El Tiempo di Bogotá, El Nacional di Caracas, y un cantidad grandi mas cu a bin di Brazil y otro paisnan di nos hemisferio.
Pensando kizas riba su fracaso como gueriyero na Chiapas, Mexico, el a bay recrea su rol partiendo panfleta na e delegadonan cu tabata bahando for di busnan di De Palm Tours. A surgi un incidente ora cu un di su ayegadonan a hinca un camara den cara di mi yiu y esaki a pidie den tres ocasion pa e kita e camara y anula e potret, y a haya como contesta un letania di palabra malo. No a keda mi yiu mas curso di accion cu gara e camera for di e provocador y hibe suela cu su doño. E grito di Rudy Lampe tabata: proces verbal! Mi no sa ta ki dia el a bira polis o fiscal pa exigi esey, pero mescos cu durante e manifestacion den cual el a cucuya pa nan kima auto y destrui propiedadnan di Pueblo, el a trata un biaha mas, via otronan, di mustra su caracter violento di politico fracasa. Pakico e no ta conta Pueblo e motibonan cu a obligue bandona Bonaire cu tanto prisa? Y kico a pase na Mexico cu e mester a bolbe huy pa e ehercito Mexicano no pone man riba dje?
Den ningun momento el a pensa riba e daño cu su accion por causa Aruba, sino solamente riba e enfermedad narcisista cu ta domine y su ambicion di fama y popularidad. Wel, lagami bise claramente cu e no ta disfruta di ningun di nan! Pueblo a cante esey dia 25 di September 2009 ora cu el a kite e asiento solitario cu e tabata tin den Parlamento y a dune e mensahe categorico: nos no kier bo mas den nos sala legislativo, y ni tampoco den nos panorama político! Haciendo caso omiso di e mandato ey di Pueblo, e ta persisti di haci su mes ridiculo den su afan ciego di plak su cara den corant mas hopi biaha cu e por, aunke e no tin nada di bisa y no tin hende cu kier scuche tampoco. E ta simplemente un politico fracasa cu no por a ni sikiera mantene den su partido hendenan cu inicialmente a kere den dje, pero cu despues di a mira su locuranan a bandone na su suerte.
