Situacion na departamento di Cultura tabata insoportable
Segun abogado Kuster, te cu tin trahadornan bao di tratamento psiquiatrico
ORANJESTAD(AAN): Diamars na corte a tuma lugar un caso sumario cu directora di Departamento di Cultura Ruby Eckmeyer a entama contra Gobierno di Aruba. Señora Eckmeyer a entama e caso, door cu Minister di Economia y Cultura Michelle Hooyboer Winklaar a apunta Jan van der Straten como director ad interim pa algun tempo, door cu tabata tin diferente problema entre e directora y empleadonan di e departamento.
Huez a cuminza na menciona motibo cu e caso a wordo entama y a puntra abogado representando Gobierno mr. Kuster, pa e duna un splicacion di e medida tuma pa e Minister.
Segun Kuster, no ta asina cu sra Eckmeyer a wordo manda cas of cu el a wordo suspendi.
E abogado a splica cu desde cu tabata tin un reorganizacion na Departamento di Cultura, a surgi problemanan entre empleadonan di e departamento y e directora.
A dicidi di laga un comision hasi un evaluacion di e situacion y e Minister a dicidi di pone van der Straten como director ad interim, pa trece trankilidad bek den e departamento.
Mientrastanto intencion tabata pues cu e directora temporalmente lo no tin e autoridad di directora, pero cu banda di van der Straten e lo ta activo den e departamento.
Intencion tabata pues pa e evaluacion tuma lugar, sin cu e directora lo tin mucho contacto cu e empleadonan.
Kuster a bisa cu e Minister a haya necesario pa trece van der Straten pa e purba trece bek un trankilidad, pasobra hopi di e trahadornan tabata malcontento cu e situacion. Te hasta tabata tin trahadornan cu ta bao di tratamento psiquiatrico y varios a welga tambe un tempo pasa.
Tabata tin empleadonan cu a indica cu e situacion tabata asina insoportable cu ta yora nan tabata yora.
E abogado a trece dilanti cu sra Eckmeyer ta hasi como si fuera Gobierno ta un dictador cu e meta di kite for di trabao, pero segun e abogado si Gobierno tabata tin intencion di kite, e Minister lo a por ehempel prohibi’e di drenta e departamento pero e Minister no a hasi esaki.
Despues cu Eckmeyer a haya sa cu e Minister a dicidi di pone van der Straten como director ad interim, sra Eckmeyer a cuminza bin menos na trabao, tabata tuma dianan extra liber y te hasta el a bay cu su cosnan for di su oficina. E abogado a trece dilanti cu pa e Minister tabata hopi cla cu directora no tabata tin mucho experiencia den management.
El a bisa tambe cu tin un carta poni na diferente lugar como accion di firma contra e Hulandes Europeo van der Straten y cu segun informacion ta sra Eckmeyer lo ta tras di esaki, pero den corte abogado Hernandez Swaen kende ta representa e directora a bisa cu su cliente no tabata tin nada di haber cu esaki.
Abogado Kuster a bisa huez tambe cu desde cu van der Straten a wordo apunta na Departamento di Cultura, trankilidad a bolbe y e empleadonan ta produciendo hopi bon atrobe. E abogado a bisa tambe cu sra Eckmeyer no a sufri ningun daño pasobra e no a wordo kita, e tin su salario ainda y e tin e tarea pa hunto cu van der Straten duna su input.
Abogado Hernandez Swaen a bisa cu e decision cu e Minister a bin cune pa pone un director ad interim ta pone cu sra Eckmeyer a perde su autoridad pa tuma decisionnan cu tin di haber cu maneho y finanzas.
Ora sra Eckmeyer a haya sa intencion di e Minister, el a manda un carta na e Minister pa pidie pa e haya su posicion bek manera cu e tabata y ora e Minister a nenga, el a manda un ‘bezwaarschrift’ y un peticion pa e caso sumario.
E abogado a splica cu ora e departamento tabata tin mester un director na 2007, a cuminza un procedura di solicitud y for di e 11 personanan cu a aplica pa e puesto, sra Eckmeyer tabata esun mihor califica y el a wordo escogi.
Sinembargo for di momento cu el a haya e puesto, tabata tin un grupo di persona cu tabata contra esaki. Segun e abogado, e grupo di personanan aki semper ta protesta contra cualkier director.
E abogado a bisa cu sra Eckmeyer sinembargo a keda traha cu entusiasmo tratando di hasi tambe ‘team building’.
El a organiza diferente workshop pa e trahadornan y a repasa cu nan e reglanan adapta di e departamento.
Hernandez Swaen a bisa cu e forma cu e directora a wordo hala un banda no ta e manera corecto.
E abogado a bisa cu un director of directora mester wordo duna suficiente tempo pa e hasi su trabao, pero Eckmeyer no a haya suficiente tempo y sin base legal a kita autoridad for di dje.
El a bisa cu si un decision asina wordo tuma contra un ambtenaar, mester wordo duna un bon splicacion di e motibonan exacto, pero esaki no a sosode.
E abogado a bisa tambe cu ta wordo bisa cu tur empleado tin problema cu e directora pero cu esey no ta berdad. Supuestamente e intencion tabata pa sra Eckmeyer participa hunto cu van der Straten, pero segun e abogado esey no tabata sosode.
El a duna e ehempel unda cu e lo a bay wordo informa di un reunion cu sindicato SEPPA na cual e tambe lo mester a asisti, pero na den corant el a haya sa cu e reunion a tuma lugar, sin cu el a wordo avisa.
Huez casi na final di e caso a mustra abogado Hernandez Swaen riba e hecho cu e decision tuma pa e Minister ta algo cu den ley ta permiti y cu e Minister pues por dune otro tarea, pero e abogado a bisa cu ora algo asina sosode, ta depende di ki tarea e directora wordo duna.
Tur cos ta depende di e circunstancianan segun e abogado. Huez na final a bisa cu e lo duna su veredicto otro siman Diaranzon.
