Solamente casonan proforma den Corte diabierna
ORANJESTAD (AAN): Diabierna na corte di husticia diferente sospechoso tin cu presenta pa casonan penal contra nan. Sinembargo e biaha aki tur e casonan ta proforma. Esey ta nifica cu nan lo no worde trata. E sospechosonan pa ley tin cu presenta si dilanti di huez si. Prome caso proforma ta un caso den cual J.A.L. ta worde acusa di ladronicia den un cas di propiedadnan di un persona riba 5 di November 2009. Despues J.A.S, R.A.R y R.V.W tin cu presenta dilanti di mesa berde. Ta asina cu S. ta worde acusa di ladronicia den un cas na Savaneta di joyas y otro pertenencianan riba 27 di Maart 2009, di ladronicia den un cas na Pieter Boerstraat di joyas den e periodo di April te October 2009, den un cas na Noord Cura Cabay di un computer riba 25 di Mei 2009, den un otro cas na Savaneta di placa y/of un celular riba 14 di Juli 2009 y den un cas na Noord Cura Cabay di joyas den e periodo di 10 te 14 di September 2009.
Tambe S. ta worde acusa di ladronicia den un cas na Savaneta di joyas y/of un holoshi riba 16 di October 2009.
S. y R, ta worde acusa di ladronicia den un cas na Seroe Alejandro di un computer y otro pertenencianan di hende riba 18 di September 2009.
R. ta worde acusa di ladronicia den un cas di un dienstpistool, joyas y/of un camera di un persona riba 18 di Maart 2009.
Tambe e ta worde acusa di ladronicia den un cas di un holoshi y/of joyas y/of placa di hende riba 16 di October 2009.
Conhuntamente cu un otro of otronan, e ta worde acusa di ladronicia di joyas den un cas riba 3 di November 2009.
W. ta worde acusa di, conhuntamente cu un otro of otronan, ladronicia na Baby Beach di un camera y cashi di camera di un persona riba 6 di October 2009 y riba 8 di October 2009 di holoshi y mas pertenencianan di un persona.
Tambe e ta worde acusa di, conhuntamente cu un otro of otronan, di ladronicia den un cas di holoshi y otro propiedadnan di hende riba 15 di oOctober 2009 y di ladronicia den un cas di un boter di whisky riba 15 di October 2009.
Despues A.C mester presenta dilanti di huez, debi na e hecho cu e ta worde acusa di exportacion di cocaine riba 9 di November 2009..
A.N.P. y R.N.P. tambe tin cu presenta dilanti di huez, door cu nan ta worde acusa di, conhuntamente cu un otro of otronan, a intencionalmente importa y/of transporta marihuana y/of tabatin ne den nan posesion den e periodo di December 2008 te 7 di November 2009.
Tambe nan ta worde acusa di a forma parti di un organizacion criminal di December 2008 te 7 di November 2009.
R.N.P. ta worde acusa di a, conhuntamente cu un otro of otronan, a gana y/of a tene y/of a entrega y/of a cambia y/of a uza placa, di cual e tabata sa of tabata por a sospecha cu e ta procedente di crimen.
Esey tambe den e periodo di December 2008 te 7 di November 2009. Finalmente S.M.A.H. tin cu presenta dilanti di mesa berde, door cu e ta worde acusa di, conhuntamente cu un otro of otronan, a intencionalmente tuma bida di un persona riba 10 di October 2009, door di dal e varios biaha cu un obheto duro contra su cabez, a consecuencia di cual e persona a fayece y esaki a worde sigui y/of acompaña pa ladronicia cu violencia pa dos of mas persona y a worde cometi pa prepara y/of facilita e ladronicia aki.
