Speedworld cu boso amigo Hubert furai Thiel
ORANJESTAD (AAN)—Amigonan amantenan di e fabuloso mundo di Motorsport, permiti mi persona cuminza na desea boso un feliz dia, aunke cu no sa cu pa hopi esaki ta keda marca den historia como un dia hopi dificil y cu hopi tristeza, mirando cu awe ta e dia cu nos ta bay tuma despedida di un gran persona manera cu tabata Walter Franken. Permiti mi persona, dedica e Speedworld di awe na Walter y su famia. Mi persona a siña conoce Walter ya for di un edad basta hoben, ya cu no solamente nos tur dos ta procedente di e bario di Paradera, pero tambe nos tur dos a escoge pa e deporte di Motor. Cada uno den su forma, pero semper cu tabata tin e oportunidad aunke Walter no tabata un persona di mucho papia, tog semper e tabata tin e tempo pa pasa saluda y combersa un rato cu mi persona.
Corda bon cu mi conoce Walter tempo cu na Aruba tabata traha ya caba brommer nan di careda y como mucha nos por a mira con Frank Lacle tabata un di nos idolonan. Mi persona a bay den otro direccion y Walter a keda cu su brommernan hunto cu Frank.
Na 1990 tempo cu Da Silva Racing a cumpra e Pro Bike di Werleman, y cu e rum,an di Walter, esta Lando a cuminza core pa nan, semper Walter su decir tabata cu e tambe lo yega na tin un bike asina of mihor. Semper ela gusta brommer y semper e tabata optiumista pa tin e mihor.
Manera cu Walter tabata haciendo cierto cambionan, un di e personanan cu sigur mester haya sa tabata mi persona y tempo cu ela cuminza cu su Pro Bike nobo, teasta mi tabata tin exclusividad. Papa, manera cu nos ta yama e tata di Walter, semper presente y cu hopi orguyo tabata dirigi su mes na mi y tabata bisami, Tiel, e mucha ey si ta bay duna e otro coredornan hopi dolor di cabez, paso e ta hopi bon den loke e ta haci. Na Palo Marga y na Ronde Klip, Walter tabata un persona na kende nan tabata tin hopi respet pa su persona, mirando su disciplina y respet cu e tin pa otro hende. Walter semper tabata un bon ehempel pa e otro coredornan, ya cu aparte di e disciplina, e tabata un persona cu un amplio experencia y sigur un rival pa tene extra cuenta cune.
Walter su style di ta down to the eart, a keda demostra hopi biaha ora cu e logra un titulo y tabata yega cu n trankilidad, mientras cu nos a yega di wak otro nan cu ta haci henter un fanfaria, teasta su yiu homber Randy y e otro miembronan di team tabata bula den laira y expresa nan alegria abiertamente, mientras pa nos amigo Walter tabata suficiente pone su dos dedenan den forma di peace sign y saluda su publico, esey tabata basta pe.
Ni tempo cu un di e su setupnan a bira e prome cu a drenta 8 seconde, mi tampoco tempo di e prome 7 seconde, ni tempo cu Walter a titula cam,pion na Curaçao contra Hector Arana ariba e brommer di Ceril Adamus y a logra di kibra un record ayay na Curaçao, no tabata un motibo pa Walter bula den laira y goza di e truinfo manera cualkier un di nos lo a haci.
Unda cu Walter a bay e tabata un ehempel pa otro , mustrando su dedicacion y disciplina na loke e ta haci. Ultimo ainda Walter tabata sperando pa keda cla cu su otro bike, pa nos por tabata tin un entrevista, lamentablemente papa Dios ta parce di tin mester di un mecanico cu hopi experencia y a manda buske y pa e no ta su so, e laga bini cu su dos yiunan.
Mi tin sigur cu no lo ta ami so, sino mayoria di e coredornan di brommer y street legal, lo keda haya hopi falta di Walter, Randy y lorraine y esey ta sin conta cuanto falta e ta bay haci na su famia completo.
Di parti di mi persona Hubert Tiel y Speedworld, mi kier pidi papa Dios pa yuda e famia, amigo y conocirnan di Walter Franken, Randy y Lorraine pasa dor di e momentonan dificil aki y cu tur tres sosega na paz di señor. Nos lo keda recordabo semper ruman.
