Torneo di Ping Pong Infantil y Hubenil tabata exitoso
ORANJESTAD (AAN)— Diario Deportivo tabata presente durante e delaster torneo di ranking di Ping Pong cu a tuma lugar den gymzaal di Colegio San Antonio na Santa Cruz. E torneo aki tabata pa e categorianan Infantil y Hubenil, nos por bisa cu nos por a mira un tremendo nivel di wega den e hobennan aki. Den e categoria Bao di 10 aña, na prome lugar a keda Ethan De Lange, sigui na e di dos lugar pa Alan Croes, na di tres lugar tabata Jevon Francis y na e di cuater lugar tabata Valentino Dirksz. Den e categoria 11-13 aña, e prome lugar tabata Reynaldo Dirksen, na e di dos lugar tabata Franslin Lampe, na e di tres lugar tabata Dillan Yarzagaray y na e di cuater lugar tabata Jean Pierre Hellmeyer.
Nos ta sigui cu e categoria Hubenil, esaki ta hobennan entre 14 pa 18 aña. Na prome lugar tabata Leo Dirksen, sigui pa Giomar v/d Linden na di dos lugar, na di tres lugar tabata Shawn Vlaun y na di cuater lugar Robert Garrido.
Segun informacion cu nos por a haya tambe for di ATTA, tur e hobennan aki tin e oportunidad pa representa Aruba na Puerto Rico den un campeonato mundial; e muchanan aki a mustra cu nan tin e talento cu ta rekeri pa representa nos pais dignamente, sin embargo segun Subsidie Commissie, no por otorga subsidio financiero pa atletanan di menos cu 13 aña, pa e motibo aki, ta probecha e oportunidad pa hasi un peticion na e instancia aki pa mira e caso di e hobennan aki pa wak un posibilidad pa nan por haya subsidio.
Sr. Jose Puente, coach di team di Ping Pong di Special Olympics Aruba, a probecha e oportunidad pa gradici Aruba Table Tennis Association pa e cooperacion brinda y a destaca e prestacion di su atletanan L.Tromp, Zaina Maduro y E. De Cuba. Riba e combinacion di potret por aprecia algun imagen di e torneo aki.
