Trabao di limpiesa na Aruba ta sigui
Minister Sevinger cumpliendo
ORANJESTAD (AAN): Minister di Infrastractura Benny Sevinger a pone como meta su dilanti pa percura pa nos tur por biba riba un Aruba limpi. Ta pesey mes cu funcionarionan di su despacho den cooperacion estrecho cu City Inspector Marlon Pieters, cu polis di bario y cu Serlimar, ta traha duro pa tene e isla aki limpi. A pasa den diferente bario caba pa haci limpiesa rigoroso. Ta keda na cada un di nos pa mantene nos isla den limpi despues.
Ayera durante oranan di mainta funcionarionan di Bureau di Minister Sevinger a pasa dal un bista na varios santana di auto bieu. A papia cu e doñonan di e terenonan unda tin hopi eskeleto y retaso di auto y cu nan cooperacion lo cuminsa haci e lugarnan aki limpi.
Ya for di luna di november aña pasa a cuminsa cu registracion di hendenan cu tabata yama na oficina di Minister Sevinger cu tabata pidi pa pasa recohe nan autonan bieu. Den casonan asina ta trata di un of dos auto.
Minister a cuminsa cu un procedura pa evalua si tin un compania pa tuma e metal di a autonan bieu aki pa manda esakinan afo pa reciclahe. Mester bisa cu tin hopi interes pa esaki. Ora cu e compania keda selecta lo pasa e material pa nan.
Mientrastanto gobierno mes ta recohe e autonan bieu. A selecta tres lugar caba na unda lo cuminsa cu e limpiesa aki. Un ta den e bario di Piedra Plat na unda tin mas di 40 auto bieu y container bieu, tambe na Rooi Afo y Bushiri.
Funcionarionan di despacho di Minister Sevinger y polis di bario tabata presente durante cu a pasa inspecciona e lugarnan y papia cu e doñonan. City Inspector tambe a pasa pa regla un que otro pa asina por cuminsa cu e trabao aki dialuna caba.
E edificio bieu di Texas den centro di ciudad ta keda un caminda na unda hopi sushi ta acumula. Eynan empleadonan di Serlimar a cuminsa traha duro ayera pa haci e lugar limpi. E par di adictonan eyden ta percura tambe pa hopi sushidad eyden y mester bisa cu negoshinan tambe ta tira nan sushi eyden, locual ta di condena completamente.
Ta intencion di gobierno pa mantene paden y pafo di e edificio limpi y lo pasa regularmente controla con e lugar ta y si ta necesario pa laga hacie limpi. E sushedad ta un fuente di malesa y esey nos mester evita di tur forma.
