Turismo di Venezuela awor si lo bay baha
Pronostico ta mustra scur…
ORANJESTAD (AAN): Fuentenan a mustra, cu avionnan for di Venezuela a cuminza ta yega Aruba, anto bastante ‘bashi’. Medidanan tuma door di Gobierno Venezolano, ta pone e poblacion ey rek nan faha aun mas. Turismo Venezolano semper tabata uno cu a yuda Aruba bastante.
Na 1993, Aruba a haya 492.660 turista Venezolano. Na 2009, Aruba a haya 105.063 turista Venezolano so. E pronostico ta cu e lo sigui cay, djis basa riba e cifranan di December 2009.
December 2008 a haya 21.010 turista Venezolano. Ya pa December 2009 esaki a baha te na 14.884.
Lo peor ta, cu pasashinan cumpra na Venezuela, pa e ruta di Caracas-Aruba, ta costa como 2.500 Bs.F, (cu ta casi igual na Florin)! Esey ta inalcanzable pa mayoria Venezolano.
Notable ta cu e mesun vuelo ey, e pasashi di “Aruba-Caracas” ta barata! DIARIO a nota cu e compania local, Jasaba, ta ofrece pasashi pa 2 persona bay Venezuela, na e prijs di 360 Florin total. Pues cada persona ta paga 180 Florin, pero e condicion ta cu dos hende tin di cumpre hunto.
Of bo por cumpra e pasashi di 360 Florin na Aruba, y mande pa esnan na Venezuela, di forma cu nan por haci e viahe.
Ofertanan barata pa bula pa Caracas awor for di Aruba! Apenas 180 Florin pa persona. Esey ta hasta mas barata di Aruba pa Curacao!
