Un reaccion real pa pueblo riba brandstof clausule y kico a conduci cu awe prijs a subi

Eveline stop cu politikeria barata y bay cerca Nel puntre kico el a haci…ORANJESTAD (AAN): Durante e conferencia di MEP Eveline Wever Croes kier splica gobierno di AVP con mester usa 150 di e 200 miyon Florin cu Valero lo bay duna. Eveline na lugar di kibra cabez cu esey, lo ta bon pa e bin cu alternativa con pa yena e deficit di casi 300 miyon Florin cu su partido a laga atras algun luna pasa bandonando gobernacion. DIARIO a haya un reaccion na su lugar. E reaccion aki a bin di un experto pa añanan largo den asunto di negoshi di coriente y sa exactamente kico tabata come y bebe den Elmar. Pesey mes nos ta bay code loke e persona aki a manda pa Diario pasobra ta bon pa refresca memoria di Eveline cu parce ta lubida liger.
Esaki tabata e reaccion: Mi a compronde cu MEP (Eveline) a propone e gobierno actual pa utiliza parti di e placa di Valero pa casonan social y energia alternativo.

E luna aki, esta maart 2010, e brandstof clausule a aumenta di 25,56 pa 28,2 cent/kwh. Esaki inclui, den e tarifa cu Elmar ta cobra e consumidor ta resulta den un aumento di tarifa di 42 pa 44,7 cent /kwh, locual ta e aumento di 6% cu WEB a anuncia.

Unda MEP a keda durante 2007 y 2008, den cual periode e brandstofclausule a aumenta di 15,2 pa 38,5 cent/kwh. E aumento aki di brandstofclausule aki a resulta den un aumento di 75%, ariba e tarifa di Elmar pa e consumidor, esta di 31,7 pa 55 cent/kwh.

Na e min. pres e tempo ey, e proposicion a worde presenta pa utiliza e dividendo di 2006 y 2007 di Elmar pa tanto caso nan social y tambe energia alternativa, pero nos tur sa e respuesta di Nel Oduber e tempo ey.

E aumento di 6% awor na maart 2010 aunque e ta un peso extra ariba e consumidor, no ta di compara cu e aumento di 75% durante aña 2007/2008.

Tarifa di coriente na aug 2008 tabata casi 25% mas caro cu e ta awor, maart 2010! Eveline y MEP ta continua practica polikeria barata.