Victory Outreach Aruba Ta Celebra E Dushi Cultura Di Aruba
ORANJESTAD(AAN)– Victory Outreach Aruba ta manda un cordial invitacion pa e pueblo di Aruba pa bin y celebra nos dushi cultura diadomingo 14 di Maart 2010, na Centro di Bario Playa Pabou for di 10 a.m.
Riba e fecha aki Victory Outreach ta presenta un Festival di Cultura cu lo ta yen di ambiente y lo ta crioyo crioyo!
Lo tin presentacion di gruponan folclorico, un competencia di baile acompaña pa cah’i orgel, weganan popular, y Dino jump pa muchanan,. tremendo premionan pa esnan cu competi, cu lo inclui dinner-for-two, weekend-stay, y hopi mas.
Tambe lo tin un cushina bon surti cu snacks y bebida crioyo, manera chuculati pinda, awa di tamarijn, awa di lamunchi, y hopi mas.
Segun Pastor David Wester, “E meta ta pa nos pasa dushi y celebra nos dushi cultura.” Tambe e ta informa cu e festival aki lo no ta e ultimo cu Victory Outreach lo organisa.
E festival lo habri cu hisamento di bandera pa 10 a.m., sigui pa un celebracion di gradicimento. Merdia lo tin bendemento di cuminda, balch’i pisca, kerie-kerie, of comcomber stoba. Carchinan ta obtenibel cerca miembronan di Victory Outreach.
Pa tuma contacto of pa mas informacion busca Victoryoutreach Aruba riba Facebook.
Puntra di unda a saca e inspiracion pa hasi un celebracion asina, Wester ta comenta: “Ta importante como Rubiano pa nos celebra nos cultura mas. Y pa nos ta consciente y berdaderamente aprecia nos cultura.”
Pueblo completo ta keda cordialmente invita. Bin y pasa un bon tempo hunto cu Victory Outreach, y celebra nos dushi cultura!
