Home Hudicial Abogado Duijneveld tin fe cu trahadornan di DOPV lo por haya daño...

Abogado Duijneveld tin fe cu trahadornan di DOPV lo por haya daño y perhuicio otorga pa Huez

0
0
SHARE
- Advertisement -

JudicialORANJESTAD(AAN): Diamars na corte di husticia a tuma lugar un caso cu 7 empleado di DOPV a entama contra Minister di Turismo y Transporta Otmar Oduber. Nan a entama e caso dilanti un asina yama ambtenarenrechter, door cu nan a wordo informa algun tempo pasa cu no tin lugar pa nan den DOPV. Ponencia di parti di e Minister tabata cu no tabata tin vacaturanan aproba den presupuesto di 2009 pa loke ta DOPV y cu pesey ningun fondo adicional a wordo autoriza cu lo por carga e gastonan adicional di personal.
Ponencia di Minister Oduber tabata tambe cu e empleadonan aki no ta ambtenaar, mirando cu nan no a haya nan landsbesluit. E abogaso cu a representa Minister Oduber a bisa huez tambe cu un ambtenarenrechter no por hasi e caso y cu e caso mester bay pa un huez civil.

Abogado Duijneveld representando e grupo di persona a trece dilanti cu for di basta tempo caba DOPV tin un falta di personal. El a bisa tambe cu recientemente den prensa e Minister mes a keha riba e hecho cu Aruba mester tin berguenza di e cantidad di zundramento y pelea cu ta tuma lugar na diferente caminda, entre chauffeurnan di taxi y e tour operators etc.

Net esaki ta mustra cu DOPV mester di refuerzo pa por hasi control riba e tipo di asuntonan aki.
E Minister di Transporta anterior den un carta di 21 di September 2009 a skirbi tambe cu tin un falta di personal na DOPV.

E Minister a yega na un acuerdo tambe cu Minister di Finanzas di e tempo ey pa nombramento di 10 persona pa traha na DOPV.

Esaki door cu despues di a papia cu director di ATA y e coordinador di presupuesto na Directie Financien, a dicidi cu por uza placa cu lo no a wordo uza mas pa otro post, pa por paga e personal aki.

Abogado Duijneveld a trece dilanti tambe cu e procedura di aplicacion pa traba y e procedura pa tuma e personanan aki na trabao a tuma lugar door di peticion di parti di e director y esakinan a tuma lugar hopi tempo prome cu eleccion a tuma lugar.

E prome hendenan cu a wordo tuma na DOPV a wordo tuma na Juni 2009 caba. E abogado a bisa cu aki no ta trata di nombramentonan politico, mirando cu un di e personanan cu a solicita y a wordo nenga trabao, tabata un persona cu tabata riba lista di MEP.

Abogado Duijneveld despues a indica na DIARIO cu tabata remarcable pa wak con e representante di e Minister den corte, durante tratamento di e caso a hasi diferente remarke denigrante den direccion di e grupo di 5 mama y un tata di famia cu a keda sin trabao y algun a bay reclama e señora abogado pafo di corte, puntrando e con e por drumi anochi y bisando e cu e no tin ningun sentimento humano.

Duijneveld a indica cu el a scoge di bay un ambtenarenrechter prome pa wak si e por salba e trabao di e grupo aki y si esey no logra e lo bay entama un caso civil pa exigi daño y perhuicio.
E abogado a indica cu mirando e manera cu corte ta opina di henter e sucedido, sigur e grupo lo haya daño y perhuicio paga.Dia 5 di Mei huez lo duna su veredicto den e caso aki.

- Advertisement -

DUNA COMENTARIO

Please enter your comment!
Please enter your name here