Aruba Scholarship Foundation Ta Honra Padu Lampe
ORANJESTAD (AAN): E ultimo cuater añanan Aruba Scholarship Foundation a duna un premio na e ganado di e competencia di toca piano cu Stichting CrescendO ta organiza como parti di su Aruba Piano Festival.
E premio di ASF tabata consisti di un beca pa bay studia piano bou di guia di e famia di Simon Gollo,
e gran musico di Maracaibo.
E aña aki, como cu e situacion na Maracaibo awo ta asina peligroso, Aruba Scholarship Foundation no por asumi e responsabilidad di manda un mucha bay Maracaibo. Lo no ta husto tampoco pa duna e famia Gollo e responsabilidad grandi aki. P’esey e aña aki Aruba Scholarship Foundation lo duna otro premio: un beca cu ta paga un aña di les cerca un docente aki n’Aruba. Tambe lo tin un premio pa esun cu sali na di dos luga: un beca cu ta cubri tres luna di les. E ganadonan ta liber pa scohe e docente cu nan kier.
E aña aki Aruba Piano Festival to tuma luga di dia 17 di april te dia 24 di april.
Como Padu Lampe, heroe cultural di Aruba y un gran pianista, ta celebra su di 90 aña apenas dos dia despues, Aruba Scholarship Foundation lo yama e beca cu nan lo otorga como prome premio e aña aki, Juan Chabaya “Padu” Lampe Scholarship. Cu e gesto aki Aruba Scholarship Foundation kier bisa pabien na Padu y ta honr’e pa tur loke el a haci pa cultura y educacion di nos isla stima. Cu nos Señor bendiciona Padu y dun’e hopi aña mas di bida y salud.
