Home General E accion di Ontvanger ta haci hopi daño

E accion di Ontvanger ta haci hopi daño

0
0
SHARE
- Advertisement -

belastingSegun Prome Minister
ORANJESTAD(AAN): Durante un conferencia di prensa, Prome Minister Mike Eman a papia tocante e hecho cu Servicio di Impuesto a manda un cobranza pa Valero. Segun Prome Minister, ta asina cu Gobierno a yega na un ‘settlement agreement’ cu Valero, pero e settlement agreement aki tin unicamente balor na momento cu Parlamento di Aruba aprobe. Esey ta skirbi hopi cla den e agreement. “Na momento cu parlamento duna su aprobacion, nos por logra e trankilidad fiscal, pa e situacion por bay den e direccion cu nos ta kere ta mihor pa garantiza continuidad of habri e oportunidad pa un futuro di e refineria”.
Esaki segun Eman, kende a sigui bisa cu den e settlement agreement ta poni cu Valero y pais Aruba ta stop cu e casonan na arbitrahe na Hulanda y mientrastanto lo bay parlamento pa busca aprobacion di e settlement agreement.

Nan momento cu haya e aprobacion aki, Gobierno ta cobra e placanan cu ta stipula den e agreement, cu ta 210 miyon Florin.

“Nos a haya nos mes sorpresa cu un carta di Ontvanger a base di un caso cu tabata tin na Aruba cu ya caba tabata tin un prome, pero esaki no ta e caso di arbitrahe cu nos a palabra entre e partidonan cu nos ta wanta pendiente di un settlement agreement, cu por haya su aprobacion den parlamento”.

Esaki segun Prome Minister, kende a bisa cu el a keda sorprendi cu a bin un carta den cual Ontvanger ta bisa cu nan no ta worry cu settlement agreement, cu nan ta autonomo y cu nan ta bay cobra Valero e placa.

Eman a sigui bisa cu esaki un biaha mas ta trece duda riba pais Aruba. Si tin algo cu a resalta durante e proceso di negociacion cu Valero, tabata cu nos credibilidad como pais a worde sumamente afecta pa e forma con gobierno anterior unilateralmente contrario na espectativanan cu el a crea cerca un inversionista grandi, a bin cu impuestonan nobo y impone nan riba e refineria.

Esaki segun Eman kende a sigui bisa cu constantemente e temornan ey tabata bin back pa dilanti y gobierno actual tabata asegura nan cu ta cosnan di pasado y cu nan lo por conta riba e palabracionnan haci.

Pesey ta haci extra dolor cu di un forma of otro atrobe e duda ey den e seriedad di e forma con Aruba ta atende cu casonan asina delicado ta haya manera un tipo di forza pa un accion asina.
Eman a splica cu loke Ontvanger a haci no ta na beneficio di interes general.

Prome Minister a bisa cu Gobierno a manda un carta pa Valero y e prome indicacionnan cu nan a haya ta cu Valero ta mira un diferencia entre e cobrador di impuesto y Gobierno.

Pero esey no ta un garantiya cu e ta haci bon na e duda cu tabata tin caba, si por haci acuerdonan cu pais Aruba.

DIARIO a puntra Prome Minister si Servicio di Impuesto no tabata na altura di e negociacionnan cu Valero.

Segun Eman, nan ta parti di dje y ora cu a termina negociacionnan, a trece nan hunto tambe pasobra e acuerdonan pa loke ta e settlement agreement tabata un implementacion di e Memorandum of Understanding.

“Den e implementacion di e settlement agreement, nos a haya hopi participacion di e departamento di impuesto cu a duna luz riba hopi punto.

Te hasta nan a bin cu cierto cambionan pa loke ta entre otro un regimen fiscal nobo.
Departamento di Impuesto tabata na altura di henter e proceso aki.

Nan ta autonomo berdad den nan trabao y no mara, pero toch bo mester pone den contexto di interes general.

- Advertisement -

DUNA COMENTARIO

Please enter your comment!
Please enter your name here