E posicion di PVL di APFA ta uno hopi critico y un decision mester worde tuma pronto
Segun directora general di APFA,
ORANJESTAD (AAN): Ultimo dianan aki tin masha comentario ta circula den diferente area cu APFA e fondo di pension, ta bancarota. Durante un conferencia di prensa Migdid Croes de Jong directora general di APFA a splica cu esey no ta e caso. Segun sra de Jong, APFA ta ehecuta dos reglamento cu ta PVL y NPR. PVL ta Pensioensverordening Landsdienaren y NPR ta Nieuw Pensioen Reglement. PVL ta estableci y regla pa ley y esey ta nifica cu APFA no por tin e instrumentonan den nan man pa haci cambionan den dje. E unico cos cu si por worde haci ta hisa e premie.
E premie ta halto caba y durante añanan a adverti y a concientiza tur e stakeholders cu e premie ta halto y cu el a sigui subi. Ultimo a ripara cu e premie a subi drasticamente.
De Jong a sigui bisa cu ora bo papia di PVL bo ta papia di factornan cu ta un edad di pensioen di 55 aña, no tin franchise, pues no tin ‘inbouw’ di pensioen di parti di SVB y tambe e ta ‘final pay’, e ta ‘eind loon.
E tres factornan aki ta hacie un areglo hopi caro. Ariba di esaki tambe tin un aspecto cu PVL ta un reglamento cu ta cera. Esaki ta trece cune cu ora bo compare cu NPR, APFA si tin e instrumentonan, pasobra NPR desde 2005 a worde introduci como fondo di pensioen APFA, pues e NPR por worde maneha.
Desde 2005 a introduci e NPR, pero a keda tambe cu e PVL. Señora de Jong a sigui bisa cu ora bo papia di e posicion financiero di NPR e ta uno adecua y PVL no.
Loek a pasa ta cu door cu e areglo di PVL ta asina caro door di e ingredientenan menciona caba, esey ta pone cu e premie a sigui subi y esey ta pone e ora ey tambe cu door cu no por trece cambia y hiba un maneho den esey, e ora ey e posicion financiero di PVL a deteriora.
Esaki pasobra e parti di e ‘dekkingsgraad’ di PVL a sigui baha.
E dekkingsgraad ta consisti di e capital, pero e obligacionnan via e areglo caro aki a sigui crece.
Obligacionnan a sigui crece pa mas di 10 aña caba y a adverti riba esaki.
E posicion di PVL a bira uno hopi critico y mas pronto posibel mester tuma un decision riba dje.
