Home Editorial For di Miami… POLITICA TAMBE TA DAL HOPI BUELTA!

For di Miami… POLITICA TAMBE TA DAL HOPI BUELTA!

1
0
SHARE
- Advertisement -

jossy_mansur_pic          Loke mas ta asombrami di e hendenan di MEP ta nan creencia den e concepto eroneo cu a guia nan maneho di poder for di Gobierno, un concepto cu a haci nan kere ciegamente cu pa nan tabata tin solamente un comienzo y nada di un final. Abuso tras di abuso di e poder ey a conduci na un resistencia feroz den un Pueblo cu a mira con su propiedadnan y su placa tabata desaparece den e saconan di un solo famia y su ayegadonan. Y pa e Pueblo mes? Tira pinda pe y obligue preta faha riba su necesidadnan pa nan no mustra e sufrimento cu a toca nan durante ocho aña di corupcion y nepotismo.
          E dirigentenan ey ta sigui pretende cu solo ta sali pa nan so y cu e resto di poblacion mester biba den sombra. Awor cu nan mester keda keto, aunke sea pa respet pa un Pueblo cu nan a castiga sin misericordia, ata nan ta cucuya tur hende pa obstaculiza e labornan di un Gobierno drechi cu tin e unico obhetivo di drecha loke nan a daña, y di berdad e biaha aki traha pa crea e mayor bon pa e mayor cantidad di hende. Esey ta un linea di accion cu e dirigentenan di MEP no ta compronde, pasobra pa nan lo importante tabata prolonga y crea huurnan nobo pa famia y amigonan, usa loto como un banco priva pa enrikece otro famia, bende e terenonan mas valioso di Pueblo cu financiadornan di campaña y traha brug pa madushi, entre tanto otro barbaridadnan discriminatorio cu nan a pone den practica pa perhudica e Pueblo di Aruba notablemente.

          Pero, mescos cu den tur e otro avenidanan di bida, tur cos tin un principio y un fin. Nada ta dura pa semper! Nan a lubida por completo cu tur cos ta pasahero, incluyendo posicionnan politico, y cu den e saldo di cuentanan, cobranza ta cede pa pago. Nan a goza hopi cu e poder cu Pueblo a duna nan cu e creencia cu nan tabata bay traha pe y no pa nan famianan y amigonan, pero awor e rio di placa cu tabata core di e Tesoreria di nos isla directamente pa nan saconan, a seca. Pueblo a compronde cu tanto abuso no por a continua y a pone un fin categorico na dje.

           Pa e observadornan bakiano di politica, e principio di husticia a ser cumpli. Esnan cu a biba manera Rey riba e custiya di Pueblo, awe ta cana rond manera almanan perdi, sin sa con enfrenta, no e Gobierno sino e Pueblo cu a core cu nan, y kier zambuya den lodo pa purba desacredita e ekipo mas capacita cu ami a yega di mira den tanto aña di ta sigui e wipwap di Gobiernonan na Aruba. Esnan cu no a compronde cu den e bueltanan di politica awe bo ta subi, pero mañan bo ta baha tambe si bo no a cumpli cu e expectativanan di esnan cu a vota pa bo representa nan dignamente, ta canando rond completamente desorienta! Spanto pa e investigacionnan cu ta tumando lugar a coy nan curpanan y den priva nan ta tembla pensando riba e consecuencianan.

           Acaso nan no a pensa riba loke por pasa cu nan ora Pueblo kita nan e poder cu el a otorga nan di buena fe? Nan a tene cuenta cu cada abuso, cada acto di corupcion, cada caso di nepotismo, cada accion ilegal ta crea consecuencianan penal? Ningun hende a forza nan comete e barbaridadnan ey, y mescos cu nan a comete nan cu wowonan habri, asina tambe nan mester contempla loke ta biniendo pa nan na conclusion di e investigacionnan.

           Ta con nan por scapa di e consecuencianan di nan propio imprudencianan? Na momento cu nan a sembra biento, nan mester por tabata sa cu loke nan ta bay cosecha ta horcan!

- Advertisement -

DUNA COMENTARIO

Please enter your comment!
Please enter your name here