Home General HOH a registra diesdos caso di maltrato fisico den fin di siman

HOH a registra diesdos caso di maltrato fisico den fin di siman

1
0
SHARE
- Advertisement -

bobharmsSegun declaracion di Bob Harms:
Un persona mester a keda interna!
ORANJESTAD (AAN) — DIARIO a tene un entrevista cu e Relacionista Publico di Hospital dr. Horacio Oduber, señor Bob Harms, tocante e atencion pa publico, durante e dianan di Siman Santo, ya tras di lomba. Harms a duna di conoce durante e dianan cu a pasa, vooral e fin di siman largo, varios caso di emergencia medico a keda registra. Nan ta casonan manera accidente den trafico, maltrato fisico, y otro tipo di situacionnan considera como emergencia medico.
El a subraya cu e aña aki, afortunadamente y danki na Dios, e Siman Santo a pasa relativamente trankil, unda e cantidad di casonan pa dia cu a ser registra for di Diahuebs anochi te cu Dialuna anochi, tabata relativamente poco, compara cu añanan anterior.
Principalmente pa loke ta trata accidentenan relaciona cu campamento, e aña aki e casonan tabata masha abao mes, locual ta motibo pa keda contento cune.
No obstante, tabata tin un cantidad relativamente halto di maltrato fisico, y di e 18 casonan cu Hospital a registra como emergencia medico, 12 di nan ta maltrato.
“ Mi tin cu bisa cu sin excepcion, tur e casonan aki e personanan cu a yega, tanto como victima y esnan cu tin sospecho cu nan a perpetra e maltrato fisico, tur tabata bao influencia di alcohol.
“ Pues, consumo di alcohol a hunga un rol hopi grandi den e hecho cu hendenan a bira victima di maltrato fisico, of cu e e mes perpetra e maltrato”, Harms a reitera.
El a sigui bisa cu un cantidad relativamente grandi di pacient, cu Hospital a atende, ta door di accidentennan di auto, principalmente ocasiona cu quadracernan.
“ Tabata accidentenan cu a tuma lugar tambe den e areanan panoord di Aruba, unda cu accesibilidad di e tereno ta hopi dificil pa ambulance, y e hendenan mes mester a busca formanan alternativo pa yega Hospital, y den e casonan aki tabata tin varios turista envolvi”, Bob Harms a splica.
Falta di duna preferencia tabata un di e motibonan di accidente, pero tambe e hecho cu e personanan tabata bao influencia di alcohol, Harms a señala.
No obstante, e ta haya cu e fin di siman tabata relativamente trankil pa loke ta e servicio di emergencia medico, aunke tog a resalta e casonan di maltrato fisico, unda un persona mester a keda interna y otronan a keda den un espacio special cu HOH a crea pa e personanan cu a sufri un accidente of cu a bira victima di maltrato, pero cu tabata bao influencia di alcohol.
“ Nos a tene nan den e area aki te e momento cu e docter cu ta trata nan, a haya cu ta medicamente responsable pa nan por a abandona hospital.
“ Esey a pone cu di e 12 casonan di maltrato fisico cu nos a mira, un so mester a worde interna, y e resto despues di tratamento por a bay cas”, Bob Harms a informa nos.
Vocero di Hospital a agrega cu nan ta hopi satisfecho cu e sistema di seguridad cu HOH a introduci, y e aña aki nan a redobla esaki na departamento di emergencia, a pone mas security guard cu loke normalmente ta e caso y esaki a duna su resultado.
E PR a elabora tocante un caso cu a presenta diasabra anochi, pafo di servicio di emergencia.
El a duna di conoce cu ta trata aki di un grupo di hoben cu tabata fuertemente bao influencia di alcohol, cu a presenta cu un persona cu a ricibi un tiro den su man.
E grupo aki, na momento cu nan tabata den e sala di spera y alrededor, a haci bastante bochincha loke a ocasiona cu efectivonan di seguridad mester a actua pa apacigua e grupo aki.
Asina aki, por a percura pa e trankilidad bin back y e personal di servicio di emergencia por a haci nan trabao manera mester ta.

- Advertisement -

DUNA COMENTARIO

Please enter your comment!
Please enter your name here