Mucha homber a horta cel y pa entregue bek e tabata exigi suma di 100 florin
Deal or no deal?
ORANJESTAD (AAN): Na warda Oranjestad, diamars pa 3’or di atardi a acudi un ciudadano y el a declara na polis, cu su yiu muher a entrega keho algun siman pasa di ladronicia di su celular.
Ladron a drenta den cas y entre otro a horta e cel. Pa por recupera e cell su yiu muher a keda yama e number y un persona desconoci a contesta e yamada. Doño di e cell a haci un deal cu e persona desconoci pa asina e por recupera su cell. Pero e persona na liña a haci un proposicion na e doño cell, si e kier su cell e ta exigi pa e worde paga e suma di 100 Florin.
A palabra tambe cu nan lo topa na altura di Servicio di Impuesto y Aduana (SIAD). Polis despues di a scucha e version nan a bay hunto cu denunciante pa topa cu e persona.
Na yegada na altura di lugar indica, polis a topa y aresta e homber sospechoso di inicialnan Johan. F. di 18 aña.
E sospechoso cu a haci deal or no deal a keda sin ricibi 100 Florin (Dori) y tampoco e Cell cu ta procedente di ladronicia. Awor ta colga verbaal y probablemente castigo riba su cabez.
Un biaha mas a keda comproba esun cu horta., tin den su poder of a cumpra cos horta trempan of laat ta comete pifia pa worde gara.
