Home Hudicial Multanan di 800 y 1000 florin duna na esnan cu a paga...

Multanan di 800 y 1000 florin duna na esnan cu a paga ambtenaar pa haya rijbewijs falso

3
0
SHARE
- Advertisement -

JudicialORANJESTAD(AAN): Diamars na corte di Husticia 58 persona cu tabata tin algo di haber cu rijbewijsnan falso, mester a presenta dilanti di huez. Hugo C.A a presenta dilanti di huez door cu el a wordo acusa di a paga placa na un ambtenaar, pa asina e haya un rijbewijs falso. Esaki a sosode algun aña atras y el a haya un oferta di parti di O.M pa e paga un multa di 800 florin, pero e no a paga esaki. Pesey e caso a bin dilanti di huez. Huez a puntre dicon e no a paga y el a bisa cu e no a habri su post, pues e no a ricibi e carta. Fiscal a exigi pa e paga 800 florin, of sinta 16 dia na KIA.
Huez a bay di acuerdo cu peticion di fiscal y a duna e homber un multa di 800 florin. Kesito J.A tambe a presenta dilanti di huez, door cu el a paga un persona placa pa duna esaki na un ambtenaar pa e haya rijbewijs falso, sin mester pasa un examen.

E mester a paga un multa di 1000 florin, pero el a paga 650 so. El a splica huez cu e no a paga e resto door cu el a perde su trabao e tempo ey. El a bisa si cu pronto e lo haya un trabao atrobe.
Huez a bise cu e ta haya straño cu un homber cu ta mustra fuerte asina no a logra haya un trabao pa tanto tempo.

Huez a puntre con e ta paga su awa y coriente si e no tin placa y el a bisa cu un hende ta yude cu esakinan. Huez a dicta cu K. mester paga 350 florin. El a bisa e acusado cu e por traha un areglo di pago si e kier.

Asina tambe Antonio B. a haya un multa di 1000 florin, mescos cu Juviene C. kende a paga placa na un ambtenaar pa e haya rijbewijs pa core auto y bus, sin cu el a yega di pasa cualkier examen.
Huez na diferente occasion tabata menciona con peligroso e asunto aki tabata, mirando e cantidad di hende cu tabata core rond cu rijbewijs falso, sin a yega di pasa un examen di core auto.

Bao di e 58 persona tabata tin tambe Carolina C. kende a paga pa haya un rijbewijs falso, pero door cu e ambtenaar Jeremy C. a wordo deteni, e no a haya e rijbewijs. El a yena si e formulario necesario, despues cu el a paga e ambtenaar.

Huez a dicta cu e mester paga un multa di 800 florin, of sinta 16 dia den prison. Hector J.C.P tambe ta un di esnan cu mester a paga un multa di 800 florin. Ora huez a puntre dicon e no a paga e placa den promestancia, el a bisa cu e tempo ey e no tabata tin placa, pasobra e tabata pagando un hypoteek hopi halto di FCCA.

Huez a keda remarca con serio e asunto aki ta. Huez a puntra su mes kico lo a sosode riba nos isla, si e hendenan aki lo a logra keda core cu nan rijbewijsnan falso. El a bisa cu ya caba ta asina cu Aruba ta un isla unda hopi accidente ta sosode.

- Advertisement -

DUNA COMENTARIO

Please enter your comment!
Please enter your name here