Home Editorial No tin comparacion!

No tin comparacion!

1
0
SHARE
- Advertisement -

jossy_mansur_pic        No tin un comparacion posible entre e Gobierno cu Pueblo a manda cas malamente, y esun cu el a scoge pa endereza loke e predecesor a laga na ruina. Ocho aña tabata parce un eternidad, y hopi lo a pensa cu e cadena di maldadnan cometi contra Aruba pa e delincuentenan di MEP no tabata bay conoce un fin, pero Pueblo a demostra claramente cu ta e tin e poder, y cu e poder ey el a frena e tanda di destruccionnan cu a pone nos na rand di un abismo financiero y social.
         Pa cuminza, permitimi usa e observacion di un historiador: “E inteligencia di e despotanan ta cay manera nan destinonan: nan ta biba todopoderoso manera un Dios pero ta muri e morto di malhechornan.” Parafraseando e sentencia ey, lo mi bisa cu e malvadonan di MEP a djodjo cu e placa y propiedadnan di Pueblo sin freno, pero a perde tambe saco y cangreu na final, cu un posible pasantia na KIA na conclusion di e investigacion di e Hulandesnan.

         Si bo compara e bobo mas bobo di tur e bobonan di MEP, Rudy Croes, cu e talento viviente di AVP, o sea Arthur Dowers, e unico sentimento cu bo por entretene ta esun di horor y di lastima; di horor pasobra e daño cu Rudy a causa y e desprestigio cu el a duna e puesto di Ministro di Husticia, ta altamente condenable; y lastima pasobra ta con bo por saca un persona cu a mira microbio henter su bida bao e pida glas di un microscop y coloke den un puesto pa cual e no ta sirbi y no por a haci nada otro cu desprestigie? Nos tur ta corda su storia cu e dominicananan, cu e checknan di soborno, y cu tanto otro disparate cu ta bay tuma hopi tempo pa kere di berdad cu e pesadiya ey a yega su fin.

            Pone Marisol banda di Benny Zievinger y bo mester hala un rosea pisa pa kere loke bo imaginacion ta presenta na bo wowonan! Un disparidad total, incomprendible, dorna cu Namdar, Abundance, Brug, enfin di tanto barbaridad cu bo tin di cay na rudiya y duna Dios danki cu Pueblo a forza e cambio cu un 12-8 categorico, y a haya un Ministro apto, competente y decisivo, na lugar di e entreguista cu a desperdicia e propiedadnan mas valioso di Pueblo Arubiano!
Y finalmente, si bo compara Nel cu Mike e significacion mes di e palab ra ‘comparacion’ ta core sconde di berguenza! Ey no tin ningun posible semehanza! Un nepotista versus un politico limpi, sin compromisonan di ningun clase, cu ta papia un lenguahe claro, eleva! Un político sin vision (Nel) versus uno (Mike) cu un capacidad intelectual extremadamente superior. No ta cuestion di evalua personalidadnan, sino habilidad y amor patrio. Nel tabata como Prome Ministro MEP prome y Arubiano despues; Mike ta Arubiano prome y AVP despues. O sea PATRIA prome cu PARTIDO!

            Mike no a priminti ningun hende trabao durante eleccion: su unico promesa tabata traha pa su isla y su Pueblo, y den cuatro aña drecha loke Nel y su ekipo di malandronan a daña durante nan periodo! Mike ta un Prome Ministro competente, visionario, cu un respaldo di su ekipo gana cu su sinceridad y su conocementonan político. No ta bay pasa loke tabata bisto den e época di Nel y su MEP! E barco actual di Gobierno si tin un Capitan y un conhunto di oficialnan leal na dje y dispuesto di acompañe den e noble tarea di debolbe Aruba e paz y e trankilidad, además di e solvencia financiero cu tabata su orguyo prome cu e periodo fatal introduci y sosteni pa Nel.

           E consigna no ta (y no por ta tampoco!) “ban yuda tur hende cu a vota pa nos, ban pak Gobierno cu hende cu nos no por paga, pa duna contrato y permiso contra Ley pa mantene nos hendenan contento”! No! E consigna ta: ban traha pa Aruba, ban solventa e problemanan nacional, y na caminda, extende un man na esnan cu a kere den nos y a apoya nos den e obhetivo di core cu e delincuentenan y pone un Gobierno sano, liber di corupcion y faboritismo, pa asina tur nos generacionnan venidero por haya un Aruba yen di progreso y liber di corupcion!

- Advertisement -

DUNA COMENTARIO

Please enter your comment!
Please enter your name here