Home General Si bo bay cu auto di hende y no trece back na...

Si bo bay cu auto di hende y no trece back na mesun sitio, ta ladronicia y no joyriding

0
0
SHARE
- Advertisement -

ORANJESTAD (AAN): Recientemente Sergio C Peña a aparece dilanti di mesa berde, debi na e hecho cu el a worde acusa di transporte, posesion y uso di cocaina. Ademas di esaki el a worde acusa di posesion di marihuana y ladronicia di un auto. Tur esaki entre 17 y 18 di Maart 2009.
Ta asina cu un persona a staciona su Nissan Sentra na Rancho Monte Blanco y ora el a dicidi di bay cas, el a ripara cu su auto no tabata tey mas. Den marduga di mesun dia patruya di polis a worde manda cerca di Circle K., door cu un auto tabata coriendo na un manera iresponsabel.
Nan a para e Nissan Sentra y a puntra e chauffeur di ken e auto ta y e no por a contesta bon.
Polis e ora ey a inspecciona e auto y a haya un tas preto den dje y den e tas tabata tin diferente articulo, incluyendo sakitonan cu puiro blanco y marihuana. A resulta cu e puiro blanco tabata cocaina. Polis a detene e chauffeur y e pasahero.

Sergio P. a declara na polis cu ora cu e tabata na Rancho Monte Blanco, el a acerca e persona di fam Tromp pa cumpra ecstasy, pero e persona a bise cu e no tabata tin. Loke si e tabata tin ta cocaina.

Segun Sergio, e homber a dune un tiki riba su mas y el a hala esaki. S.P a declara tambe cu e no kier a cana bay cas, pues el a test dos yabi cu e tabata tin cune y uno a logra habri e Nissan Sentra y el a bay cu e auto.

Na dado momento el a wak Tromp ta pidi un lift banda di caminda y el a dune un lift. El a bisa cu Tromp ta propietario di e cocaina y e marihuana. El a admiti si cu el a paga Tromp 50 Florin despues, pa e haya mas cocaina pa e uza.

Tromp sinembargo kende anteriormente a aparece dilanti di huez caba pa e mesun caso, a bisa cu e droga tabata di Peña. En total tabata trata di 42,1 gram di cocaina y 37,2 gram di marihuana.
Propietario di e auto tambe tabata presente na corte, pa entrega un demanda pa e daño haci na su auto.

El a splica cu e tin cu paga 450 Florin pa e drecha bumper y fender di e auto y e tin cu cumpra un luz di auto cu ta 128 Florin. El a bisa tambe cu e tin mas gasto, incluyendo gastonan di spuit e auto.

Huez a mustra propietario di e auto riba e hecho cu e mester a bin cu tur documento di e gastonan riba e auto. E homber a splica huez cu durante e caso di e otro sospechoso el a bin cu tur documento, pero cu e biaha aki el a lubida algun.

Huez a bise e ora ey cu solamente e 578 Florin e lo por exigi, pasobra e prueba di esey si e tabata tin cune. Fiscal a exigi un castigo incondicional di 5 luna contra e acusado, kitando e 52 dianan cu el a sinta caba den detencion preventivo.

Abogado Rossi Marchena representando e acusado a bisa huez cu su cliente a admiti cu el a bay cu e auto, pero cu su intencion tabata solamente pa joyride e auto pa e bay cas.
Su intencion no tabata pa keda cu e auto.

Marchena a bisa tambe cu su cliente a uza cocaina, pero e resto di e droga incluyendo e marihuana no tabata di dje. Pa loke ta daño na e auto, e abogado a splica cu no tin prueba cu ta su cliente a causa esaki.

Ta posibel cu otro auto lo por a dal den e Sentra mientras cu e tabata staciona. Pa loke ta joyriding, e fiscal a bisa cu segun ley, loke Peña a haci no tabata joyriding, sino ladronicia di e auto.

El a splica cu segun hof, joyriding ta ora bo bay cu auto di hende, pero bo ta trece back na e mesun sitio for di cual bo a coi esaki. Den e caso aki e homber a worde gara dilanti di Circle K. y su intencion tabata supuestamente pa bay cas cu e auto, pues esaki na nifica cu ta horta el a horta e auto.

Pa loke ta daño na e auto, ora e acusado a worde puntra si e mes a dal e auto, el a bisa cu mirando e hecho cu e tabata bao di influencia di droga, esaki por ta posibel. Huez na final a bisa cu e ta haya comproba e posesion y uza di cocaina, pero no posesion di marihuana. El a haya Peña culpabel tambe di ladronicia di auto.

Pa loke ta e castigo, huez a bisa cu corte mayoria di biaha ta duna hende cu nunca antes a haya problema cu husticia un chens. Peña nunca antes a worde condena pa corte, pues huez a dicidi di dune un chens.

El a duna e acusado un castigo di 150 dia, di cual 98 dia ta condicional. E 52 dianan cu ta resta e acusado a sinta caba den detencion preventivo. Huez a pone como condicion si, cu e acusado tin cu paga propietario di e auto su 578 Florin dentro di 1 aña. Si e no haci esaki, e lo tin cu bay sinta e 98 dianan cu ta colga riba su cabez.

- Advertisement -

DUNA COMENTARIO

Please enter your comment!
Please enter your name here