Tin un acuerdo entre Valero y Gobierno pa sigui haci intentonan pa e Refineria keda habri
For di Gobierno e contacto lo sigui cu Petrobras
ORANJESTAD (AAN): Refineria Valero no ta un compania desconoci pa Petrobras. Tempo di Coastal caba nan tabata tira bista riba e refineria na Aruba. Na 2008 e candela a stroba e benta di Valero na Petrobras. For di gobierno e contacto lo sigui cu Petrobras pa sigui tene e comunicacion y porta habri. Valero mester dicidi pa keda den contacto cu Petrobras, segun Minister Mike de Meza, kende ta na Brasil.
A enfatiza cu tin un acuerdo entre Valero y gobierno di Aruba pa sigui haci intentonan pa e refineria keda habri. E bon intencion di gobierno y Valero tey.
Lo haci tur cos cu ta posible pa asina yega na dje pa e refineria por habri su portanan bek, a agrega.
A enfatiza si cu no tin ningun garantia y e ta keda un situacion hopi dificil. Valero tambe tin otro operadornan of partnernan potencial ta bezig ta deal cune. No ta na su lugar, a bisa, pa e bay anuncia kendenan na y esey ta e confidencialidad cu Valero tin pa cu e diferente partnernan cu e ta bezig cune.
A indica cu e sa di Pacific Rubiales cu tin minanan di crudo na Colombia cu ta riba e bolsa na Canada cu ta un di e partnernan strategico y cu Valero ta seriamente ta evaluando cu nan tambe.
Tin algun otro mas cu Valero tin acuerdo di confidencialidad y cu ta bezig ta haci intercambionan di informacion, a bisa.
