Home Hudicial ‘Wakata’ Declara Liber Di Tur Acusacion

‘Wakata’ Declara Liber Di Tur Acusacion

3
0
SHARE
- Advertisement -

ORANJESTAD(AAN): Dialuna despues cu na diferente occasion e caso a wordo posponi, a tuma lugar e caso penal contra Edsel “Wakata” Ras, kende tabata traha den mantencion na KIA.

El a wordo acusa di un asesinato cu a tuma lugar aña pasa na Juli.

For di un principio Wakata a para ariba cu e tabata inocente y abogado Duijneveld a trece dilanti na huez na diferente ocasion, cu e no a gusta e hecho cu fiscal ta bisa cu e comportacion so caba di Wakata ta un indicacion cu e lo ta culpable.

Ta asina cu riba e anochi en cuestion despues cu a topa cu e curpa sin biba di un persona na Golden Gate, a revisa grabacion di e video di Kooyman y riba e video aki a wak Wakata ta cana bay su auto, cerca di e sitio unda e persona a wordo mata.

Door di esaki e sospecho a lanta contra Ras.

E caso a wordo posponi na diferente occasion, door cu mas testigo mester a wordo scucha.

Tambe mester a warda riba testnan di DNA y e asina yama ‘Schiethanden Test’, cu ta un test cu ta determina si un persona a uza un arma di candela.

Duijneveld na diferente occasion a trece dilanti na corte cu e supuesto declaracionnan contra su cliente no ta declaracionnan firma pa testigonan.

Ta declaracionnan cu polis a pone riba papel, bisando cu nan a tende esaki di testigonan.

Tur e declaracionnan cu si a wordo firma pa testigonan, ta declaracionnan na fabor di Wakata, indicando cu e no ta e persona cu a comete e crimen.

E schiethanden test tambe a Sali na fabor di e acusado, mescos cu e test di DNA.

Mirando cu Fiscal tambe a realiza cu no tin suficiente evidencia contra Wakata, Dialuna el a pidi huez pa declara e acusado liber di tur acusacion.

Naturalmente abogado di e sospechoso tabata di acuerdo cu esaki y huez no por a hasi nada otro cu declara Wakata liber di tur acusacion.

En total Wakata a sinta alrededor di 6 luna den prison y segun ley si salario di un persona wordo para door cu el a cay cera, e ta haya e placa aki bek, si e wordo declara liber.

Esaki segun abogado Duijneveld, kende a indica cu ta bay busca pa haya e placa aki bek pa su cliente.

- Advertisement -

DUNA COMENTARIO

Please enter your comment!
Please enter your name here