Home Politica Analisis politico – Mester Por Hari Tambe

Analisis politico – Mester Por Hari Tambe

0
0
SHARE
- Advertisement -

ORANJESTAD (AAN): Den nos analisis politico tur biaha nos ta enfatisa cu eleccion di aña pasa a pone MEP den oposicion cu un derota basta grandi pero cu esaki no kier meen cu e peliger di e mentalidad di e dirigentenan di MEP a worde elimina. Alcontrario den nan rabia cu nan perdemento nan a bira mas fanatico y si mañan nan lo por bin na poder atrobe nan lo ta pio cu loke nan tabata e ultimo ocho aña.

   E mentalidad destructivo nan ta ventila tur dia mustrando cu nada no a cambia pa nan. Sinembargo den tur e cosnan serio y negativo rond di nan  tabatin tambe algun cos pa hari.  Awo tin biaha e miembronan di staten di MEP kier trata di mustra nan votadornan cu nan tey ainda y cu hasta na ta purba di score. Asina nos por a tende Nilo Swaen haci un esfuerzo pa hustifica su presencia ainda den politica. Su palabranan a pone hopi hende hari cu smaak.

   Su palabranan a hala hopi atencion ora cu e a declara cu e hendenan di AVP no mester keda wak atras pero mester concentra ariba futuro. No ta sigur cu e haci esaki pa haci un poco bofon di su mes of e tabata serio pero ta humoristico di tende un di esnan di MEP cu pa ocho aña largo no a papia nada otro cu di e gobierno anterior awe ta pidi e dirigentenan di AVP pa wak futuro y no concentra ariba pasado. Ocho aña largo e represntantenan di MEP a desgracia nos isla di tur sorto di manera.

   Bao e mesun Nilo Swaen aki finanzas publico a bira un farce total. Bao di e mesun Nilo Swaen nos pueblo a worde castiga cruelmente cu un serie di medida. Bao di mesun Nilo Swaen nos economia a bay den un crisis dramatico y awe e kier meen cu esnan di AVP cu a tuma over e desaster cu MEP a laga como herencia no mag wak atras pero solamente wak dilanti y soluciona tur e problemenan cu MEP a laga pa worde soluciona.

   Pa colmo e gobierno nobo di AVP di biaha a cuminza na soluciona algun di e dificultadnan mas grandi cu a afecta nos pueblo. KLM a bandona Aruba pa motibo di mal maneho di MEP y nada otro. Ora a reuni cu KLM a resulta cu e gobierno di MEP a ni compronde con importante KLM ta pa economia di Aruba.  Nan concentracion tabata solamente dirigi ariba e interesnan di nan mes y di e hendenan cerca di nan. E baymento di KLM tabata un sla duro y a worde atendi casi den e prome oranan di e gobierno nobo.

   Awe nos tin KLM back na Aruba y cu un bon maneho den futuro su presencia lo crece atrobe. Un di e otro dañonan grandi cu e hendenan di MEP a haci na Aruba tabata e schop cu na a dal un di e cruceronan mas valioso pa Aruba. Hopi di nos hendenan tabata biba di e binimento di esun barco tur siman. Gobierno di AVP ta treciendo e compania aki back pa Aruba pero Nilo Swaen ta di opinion cu no mester corda con MEP a desgracia nos pais.

   Tur hende mester lubida kico nan a haci y e gobierno di AVP solamente mester soluciona e problemanan. Mita di e BBO a worde kita pero tur hende mester lubida cu MEP a bin cu e medida aki solamente pa enrekize nan mes y nan hendenan. Awe tin un chance chikito cu Valero lo habri atrobe pero ora nos tende Nilo Swaen cu nos no mag wak atras y nos pensa con e ceramento di Valero a bay e ta pone hende hari. Valero kier a keda y inverti 2 biyon di Florin pa modernisa y renova henter e planta di Aruba y paga por lo menso 50 miyon Florin pa aña si e refineria gana of perde.

   Nilo Swaen tabata sinta banda di Nel Oduber ora cu nan a dicidi di  no acepta e proposicion di Valero. Awe Valero lo tabata den operacion y nos hendenan lo tabata na trabao. Nilo Swaen no kier pa nos corda nan maneho fatal y ta pidi nos pa solamente wak futuro y no corda nan mes votadornan kico nan a haci cu nos isla e ocho añanan di nan gobernacion.

- Advertisement -

DUNA COMENTARIO

Please enter your comment!
Please enter your name here