Home General Arubiano Judy Paskel na cabez di un fundación na Costa Rica cu...

Arubiano Judy Paskel na cabez di un fundación na Costa Rica cu ta yuda e muchanan sin cuero

5
1
SHARE
- Advertisement -

fundcion1Fundacion Debra dunando sosten na muchanan cu Epidermolisis Bulosa:ORANJESTAD (AAN): Na Costa Rica, DIARIO a tene un entrevista cu Judy Paskel van der Wielen, kende además di ta un empresario hopi exitoso, e tin un labor social hopi reconoci tanto pa e gobierno tico como pa e comunidad. Judy ta fundador di Fundacion Debra. Debra ta un instancia cu tin e meta di duna sosten y apoyo na e famianan cu muchanan cu ta sufri e maleza conoci como “Epidermolisis Bulosa” of “Ichtiosis”.
E muchanan cu ta padece e maleza aki ta worde conoci como “Ninos Mariposa” (Muchanan Barbulet of Muchanan di Glas) E maleza aki (EB) ta un serie di transtornonan hereditario cu ta haci e cuero y e mucosanan bira hopi frágil. E manifestacionnan ta varia entre blar y ulceranan cu ta cicatriza lentamente.

E cicatriznan aki ta causa desfiguración y inmobilización di dede, pia y articulacionnan. E blarnan y e cicatriznan por aparece den henter curpa incluso boca, esófago y stoma y por causa complicacionnan serio y consecuentemente infeccionnan secundario, anemia y desnutrición.

fundcion2Ta ser calcula cu 1 di cada 50 mil infante ta nace cu EB, Judy Paskel a señala. E pacientnan di EB por padece esaki leve of severamente. Esnan cu ta padece den un forma mas leve por tin periodonan di discapacidad temporal pero por hiba un bida relativamente normal y productivo.
Den e forma mas severo, EB por ta devastador físico y emocionalmente loke ta provoca cu e pacient ta keda totalmente inhabilita y deforma.

Cu e cuido medico apropia y e apoyo di e famia y amigonan, e tasa di supervivencia y e calidad di bida di hopi pacient a mehora significativamente. Actualmente no tin cura pa EB pero e famianan y esnan cu ta padece e maleza aki no ta sucumbi den nan lucha.

Señora Paskel cu ta e fundadora di Fundacion Debra na Costa Rica a indica cu den añanan 80 e tabata pionero den loke awe ta worde conoci como Programa di Hogarnan Infantil. A bisa cu e prome hogarcito modelo tabata na Santo Domingo di Heredia (1979), unda e ta biba. Eynan el a traha 6 aña como boluntario y pa promove e asina yama hogarcitonan.

E meta di e hogarcitonan tabata pa duna esnan huérfano un hogar. Pa na lugar di e muchanan ta den un horfanato, pa den un pueblo chikito, esnan di e pueblo wak pa e muchanan atravez di donacionnan.

E concepto aki a permanece te awendia aunke ya Judy no ta involucra mas den dje.
Actualmente tin hopi hogarcito na Costa Rica y Judy Paskel por ta hopi orguyoso di por a pone e prome piedra den loke ta e proyecto aki na beneficio di e muchanan sin hogar y den riesgo social.
Ta for di 10 aña pasa cu pa casualidad, a bisa, un señora cu tabata yude na su cas tabata papia hopi di un mucha sin cuero. “Mi tabata wak esaki como algo imposible”, a declara.

E señora aki tabata papia asina hopi di e mucha aki cu un dia el a haya oportunidad di wak e mucha cu un maleza cu yama “Ichtiosis”. E muchanan aki ta produci den exceso celulanan morto di e cuero cu consecuecia cu e cuero ta cay, a bisa.

Ora cu el a conoce e mucha, nan a cuminza yuda e famia y nan a mande Merca pa tratamento. Ta di e manera aki con nan a cuminza busca información y a lanta loke awe ta Fundacion Debra. Nan a cuminza traha cu muchanan cu Ichtiosis y Epidermolisis bulosa.

E oficina di Debra ta ubica den e hardin di Hotel Bougainvillea, di nan propiedad. Esaki ta e proyecto cu actualmente Judy ta basta ocupa cune. Debra ta traha conhuntamente cu Hospital Nacional de Ninos. Nan ta duna apoyo na e centro hospitalario aki den loke ta tratamento di e muchanan cu e maleza aki.

“Despues di hopi aña involucra den e mundo di negoshi na Costa Rica, e comunidad ta conoce nos y sa cu nos ta personanan serio y pesey nos a haya hopi apoyo”, a señala. Tin comerciantenan grandi cu a duna nan sosten cu campañanan publicitario pa e fundación. Di e forma aki nan a logra duna hopi ayudo na e personanan cu tin mester.

Na e momentonan aki un promedio di 20 famia cu ta hayando apoyo financiero di parti di Fundacion Debra. E razón di existencia di Debra ta pa concientiza e comunidad encuanto e maleza ya cu esaki ta un maleza poco común y cu no ta haya e atención cu e merece, según Paskel.

Na Costa Rica, prome cu e fundación, e famianan tabata isola e muchanan malo ya cu ni un hende tabata splica nan kico tabata pasa cu nan yiunan. Nan tabata kere cu e muchanan tabata tin lepra, un maleza contagioso, a bisa.

Loke Debra ta haci ta duna información na e comunidad, riba kico ta e maleza además brinda nan e apoyo emocional y económico, a expresa. Fundacion Debra ta un organización sin fin di lucro conforma pa docternan, empresarionan y mayornan di muchanan cu ta padece e malezanan aki . E ta conta cu e sosten di e Conseho Nacional di Rehabilitacion y Educacion Especial como di Hospital Nacional de Ninos.

Sin duda, e labor cu Judy Paskel a bin ta eherciendo na Costa Rica ta uno hopi balioso y cu merece di worde reconoci tambe na su isla natal.

- Advertisement -

1 COMMENT

  1. Lieve Judy,met veel bewondering heb ik uw stuk gelezen over de huidziekte van kinderen waar u mee werkt.Ik heb 1x uw man ontmoet met Juan Edgar Picado in uw mooie hotel.Ik heb zelf 10 jaar in costa rica gewoond en zal er over 2 jaar weer zijn.Mijn vrouw is ook Arubaanse.Ik zou u graag willen laten kennis maken met een zeer bijzonder product die u misschien zou kunnen helpen bij uw werk.psoriasis een hele ernstige vorm van huidziekte hebben mensen met dit product goede resutaten behaald.Op de website heeft u vast een indruk over dit wonderbaarlijk product.Als u er meer over wilt weten na het zien over de studies die er zijn gedaan dan help ik u graag op weg.Via mijn hotmail zie ik graag een reactie van u tegemoet.Met vriendelijke groetjes van John.

DUNA COMENTARIO

Please enter your comment!
Please enter your name here