Mi no tabata tin ningun intencion di comenta riba loke ta pasando actualmente cu esnan cu conscientemente a comete nan bagamunderianan y awor ta yora malai henter dia di Dios, comosifuera otronan a forza nan na punta di pistola pa comete nan barbaridadnan. Pero, ta dificil keda sin señala semehante eror di pensamento! E responsabilidad pa e hechonan delicitivo ta, al fin y al cabo, di esnan cu a comete nan, y pesey mes, ta nan mester cargue.
Un letania sin fin ta yena aire for di un radioemisora, y infamianan ta susha e blachinan di mes hopi mancha caba di un panfleta cu pretension di periodismo, propaga pa kendenan ta kere cu mientras mas duro nan grita, mas razon nan ta haya, y cu mientras mas intenso e ofensanan cu nan ta skirbi, menos castigo nan lo haya pa nan improperionan! E tipo di pensamento troci aki ta procedente di mentenan enfermo, cu tin mester di un auxilio inmediato di cualke profesional di medicina specializa den e ramo di Freud o Pavlov.
Dostoievski, e famoso escritor Ruso, a skirbi un notable novela (awe un clasico di literatura) cu e nomber di e titulo di awe di e columna aki. E ta un tratado di crimen y su consecuente castigo. Mi no por compronde con esnan cu a comete tanto infamia contra un Pueblo asina decente manera esun di nos, por a kere cu nan crimennan lo pasa pa historia sin castigo. Mi ta nenga di acepta, ademas, e falta di razonamento di kendenan te ayera tabata djodjo cu e placa y propiedadnan di Pueblo, hibando bidanan di luho riba custia di un Pueblo trahador, y awe cu spanto a coy nan curpanan, ta kere cu gritando lo mas duro cu nan por na radio, y skirbiendo tur clase di porkeria den un Solo decadente, nan ta bay libra nan mes di un castigo cu ta acercando for di horizonte pa bati na nan portanan.
Loke nan a haci cu e propiedadnan di Pueblo no tin nomber! Y loke nan a canaliza di Lotto pa Deporte pa nan saconan na lugar di mande pa e ekiponan deportivo cu tabata conta cu e ayudo financiero ey, ta bay tin consecuencianan grave. Logica mester por a adverti nan cu loke nan tabata haciendo ta contra Ley, contra moral y contra etica. Apropia pa bo mes e placa cu ta pertenece na henter un poblacion ta un crimen cu di su propio naturaleza ta sclama pa un castigo ehemplar.
E raportnan di e investigacionnan ta cla, y varios di nan a yega caba na e oficinanan di esnan cu Pueblo a encarga cu e coreccion di loke tabata malo. No ta AVP ni Jossy, ni DIARIO, ni Speed o Django a bisa boso haci loke boso a haci cu tanto alevosia; ta boso mes a dicidi di drenta e mundo scur di placa facil pa indebidamente apropia pa boso mes loke ta di Pueblo. Tur crimen merece castigo, y mientras mas grandi e infraccion, mas severo e consecuencia!
Awor boso kier desconoce e Ley historico cu ta bay ser cumpli na Aruba, o sea esun cu logica ta impone y cu autoridadnan honesto mester ehecuta. Si bo a comete un crimen, spera castigo pe!
